VOV4.Bahnar - Lơ̆m 5 sơ năm truh, dêh char Dak Lak gô ‘măn hloh 20 ti hlak jên vă hơ nơ̆ng jang kiơ̆ trong tơ lĕch jang vei răk păng tơ ƀăk mong joh ayŏ chĭng chêng tơ̆ tơ ring. ‘Nâu jĭ tơ drong tơm Trong tơ lĕch jang kiơ̆ Tơ drong tơ chơ̆t đơ̆ng Jơ nŭm pơ gơ̆r kon pơ lei dêh char găh vei răk păng tơ băk mong joh ayŏ chĭng chêng dêh char Dak Lak, jăl jang 2022 – 2025 ‘nao đei Anih vei lăng kon pơ lei dêh char Dak Lak tơ lĕch ăn ‘nao âu.

Mă hơ dăh ‘noh, kiơ̆ Trong tơ lĕch jang kiơ̆ Tơ drong tơ chơ̆t đơ̆ng Jơ nŭm pơ gơ̆r kon pơ lei dêh char tơ lĕch jang dôm tơ drong jang hơ iă nhen: pơm lơ trong tơ roi tơ băt, tơ ƀôh, vei răk tơ mam joh ayŏ chĭng chêng. Rim sơ năm pơ gơ̆r pơm ming dơ̆ng tŏ sĕt hloh 1 tơ drong lêh joăt joe kơ rim hơ drĕch kon kông lơ̆m tơ ring tơ klep hăm tơ drong jang vei răk joh ayŏ chĭng chêng. Tơ chĕng hơ len, tơ chă ‘măn răk, tơ iung ming dơ̆ng, chă iŏk, pơ tho păng hơ tŏk ‘lơ̆ng iŏk yua dôm ƀai chĭng chêng so kơ hơ drĕch Êđê, M’nông lơ̆m oei sa tơ pôl.

Thuem: Tơ blơ̆