VOV4.Bahnar - Jang kiơ̆ Năr đŏk hla ar, tơ̆ Hnam trưng hŏk jăl 3 Võ Văn Kiệt, apŭng Ea H’Leo, Khŭl jang găh joh ayŏ kơ dŏ soang dêh char Dak Lak jang hơ dai hăm Anih vei lăng joh ayŏ, tơ plŏng kơ dâu păng tơ mang lăng, Anih vei lăng pơ tho pơ hrăm, anih jang Đoan dêh char păng Thư viện dêh char pơ gơ̆r Tơ drong jang “ Hla ar păng sơ năm mơ lôh hŏk pơ hrăm”.

Năr lêh pơ gơ̆r dôm tơ drong jang nhen: Tơ lĕch tơ drong pơ long Bơ ngai tang măt tơ drong đŏk hla ar dêh char Dak Lak sơ năm 2022; roi tơ ƀôh hla ar “Tơ mam kăl Hồ Chí Minh- Kơ thơ gơ̆ih kơ hơ druh tơ dăm”; tơ roi tơ băt khôi luơ̆t “ Vei sơ đơ̆ng kơ tơ̆ng ang mưh yua internet păng mạng tơ pôl”. Yă  Niê Thanh Mai, Kơ dră Khŭl jang găh joh ayŏ kơ dŏ soang dêh char Dak Lak tơ băt, tơ drong jang vă tơ gŭm đe oh hŏk tro đei dơ̆ng tơ drong hiôk gơh tơ jê̆ hăm hla ar, pơm tơ drong ‘lơ̆ng hơ tŏk tơ iung tơ drong đŏk đơ̆ng hơ nih hnam trưng, mă loi ‘noh jĭ dôm hnam trưng tơ̆ tơ ring hơ tăih hơ tŏ.

Thuem: Tơ blơ̆