Kiơ̆ hơlen đơ̆ng Hơnih Đảng dêh char Đak Lăk, hloh 15 sơnăm tơlĕch jang kiơ̆ Tơdrong tơchơ̆t 23 đơ̆ng Hơnih tơm Chinh trĭ jăl 10, tơdrong jang joh ayŏ kơdŏ soang kơ dêh char hlôi iŏk đei jơnei hơ iă. Dêh char đei dơ̆ng lơ tơdrong tơchăr hle găh tơdrong tơblăh vang kĕch mang, tơ iung pơjing xã hội chủ nghĩa, pôk pơ ư jơhngơ̆m đon hưch hanh hơmanh bơnê pơlei pơla, teh đak, pôk pơ ư kơ Đảng, kơ Ƀok Hô păng ‘măng tơplih ‘nao.

Tơ̆ hop akŏm rim kơdră tang măt chă pơma dơnuh găh rim trong jang vă hơnơ̆ng tơ iung pơjing păng atŏk tơ iung joh ayŏ kơdŏ soang lơ̆m chăl ‘nao, tơdrong kiơ̆ rok yok jơ̆ng tơdrong joh ayŏ kơdŏ soang rim hơdrung kon kông Tây Nguyên lơ̆m rim tơdrong pơcheh tơdrong tơroi hle, tơdrong joh asoang. Bơ̆ jang vei răk tơƀăk mong rim tơdrong kăp gĭt tơdrong joh ayŏ joăt joe sơ̆ ki; atŏk kơtang hơnăp jang kơ khul joh ayŏ kơdŏ soang tơring lơ̆m tơdrong chă pơcheh, pơgơ̆r tơchĕng hơlen, atŏk kơtang hơlen hơdăh dôm tơdrong tơroi hle, tơdrong joh hơri.