Pơgê 12/3, tơ̆ thĭ trơ̆n Liên Sơn, apŭng Lắk, dêh char Dak Lak pơgơ̆r thi hao thŏng nan tơ̆ dơnâu Lắk ‘măng mă 3, sơnăm 2023. ‘Nâu jĭ 1 lơ̆m 18 tơdrong jang lơ̆m Lêh chĕh phe Buôn Ma Thuột ‘măng mă 8, sơnăm 2023 oei pơgơ̆r tơ̆ Dak Lak. Tơdrong hao thi thŏng nan ‘măng mă âu đei 5 khul vang thi  hăm 86 ‘nu bơngai truh đơ̆ng dôm xăh, thĭ trơ̆n păng anih chă tơmang lăng lơ̆m apŭng Lắk.

Dôm bơngai thi vang thi găh 3 tơdrong đei: hao thŏng nan 4 ‘nu, hao thŏng nan 3 ‘nu păng hao thŏng nan 2 ‘nu. Hao thi hơtăih 300m. Tôch tơdrong thi, anih pơ gơ̆r hơpăh 3 yaih như̆k, 3 yaih ƀar, 3 yaih pêng păng 6 yaih pơ čhơp jơhngâm; Khul thĭ trơ̆n Liên Sơn iŏk đei yaih như̆k đĭ đăng khul.

Kiơ̆ Anih pơgơ̆r, tơdrong thi hao thŏng nan ‘măng mă âu đei năng pơm tơplih ‘nao trong vei lăng, tưk tơiung dôm tơdrong jŏh ayŏ kăp gĭt đơ̆ng sơ̆ păng ‘lơ̆ng hơiă đơ̆ng dôm hơdrech hơdrung tơ̆ tơring, hơnhăk dôm kơjă kăp gĭt đơ̆ng jŏh ayŏ kơdŏ xoang vih dơ̆ng hăm tơdrong arih xa pơvih ăn kon pơlei păng tơmoi chă tơmang lăng. Kŭm hăm thi hao thŏng nan, dôm năr âu ki tơ̆ apŭng Lắk oei pơgơ̆r lơ tơdrong jŏh ayŏ kơdŏ xoang tôch hơiă kơ hơdrĕch kon kông nhen: soi kôch đak, soi jơhngâm pran ăn rôih, lêh tơjur thŏng nan tơ̆ đak, tôn chĭng chêng, pơm kơtrăi păng ming pơdă tơmam so...

Tơ̆ Hơnih pơm lêh Bản Đôn, xăh Krông Na, apŭng Buôn Đôn (Dak lak), pơgơ̆r Năr rôih Buôn Đôn. Tơdrong pơgơ̆r ‘lơ̆ng hơiă âu hlôi sơng đei rơbâu ‘nu kon pơlei tơring kŭm hăm tơmoi lơ̆m păng ‘ngoăih teh đak vang akŏm. Vang truh akŏm Năr rôih Buôn Đôn sơnăm ‘nâu đei 7 tŏ rôih đơ̆ng dôm tơ ‘ngla rôih truh đơ̆ng dôm anih jang mơdro sa, ŭnh hnam lơ̆m apŭng Buôn Đôn. Pha hăm dôm năr lêh hơdrol sơ̆.

Năr rôih Buôn Đôn sơnăm ‘nâu ưh kơ đei ăn Rôih pơ long kơ dâu, rôih đă ƀŏng lŏng, hao rôih yak trong đak krong Srêpốk; tơplih lơ̆m noh ‘noh jĭ dôm kơ loăi tơmang lăng hiôk ‘lơ̆ng hăm rôih tŏk bŏk đei dôm kŏng ti tơmang lăng lơ̆m apŭng plĕnh teh tơmơ̆t yua nhen: Pơ long pơ ngă ăn kơ rôih, Rôih vang kơ kuh kơ tơmoi đei pơm ’lơ̆ng hloh, ăn kơ rôih sa lơ tơmam, phĭn rup hăm tơmoi. Pơtôch tơdrong pơ long, rôih  Khăm Sing kơ tơ ‘ngla rôih Y Wưn Byă tôch kơ hơgei iŏk đei jơnei mă mônh tơ̆ tơdrong pơngă ‘lơ̆ng. ‘Ngoăih kơ ‘noh, anih pơgơ̆r hlôi pơjao lơ tơmam hơpăh ăn kơ dôm tơ ‘ngla rôih păng rôih vang akŏm năr rôih.

Tơ̆ Anih chă tơmang lăng Ko Tam, plt Buôn Ma Thuột, Anih pơgơ̆r Lêh chĕh phe Buôn Ma Thuột pơgơ̆r thi pơm tơmam đơ̆ng tơm ‘long chĕh phe. Tơdrong thi pơm tơmam đơ̆ng tơm ‘long chĕh phe sơng đei 53 ‘nu bơngai truh đơ̆ng dôm apŭng, plt lơ̆m dêh char Dak Lak păng dôm dêh char Dak Nông, Gia Lai, Kon Tum păng Lâm Đồng vang akŏm.

Lơ̆m 3 năr, dôm bơ ngai thi akŏm jơhngâm pơm tơlĕch dôm tơmam ƀơm truh tơdrong arih xa, jang xa kơ dôm hơdrĕch kon kông Tây Nguyên, tơdrong vei lăng cham char, vei lăng sem bri brăh kăp gĭt, đon hơpơi ‘mĕh jang tŏk, pơm hơtŏk kơjă tơmam chĕh phe păng dôm tơmam pơm pơrŏ lơ̆m tơdrong arih xa. Pơtôch tơdrong thi, anih pơgơ̆r hơpăh 1 yaih như̆k, 2 yaih ƀar, 3 yaih pêng, 5 yaih pơ čhơp jơhngâm ăn 11 ‘nu bơngai pơm đei tơmam ‘lơ̆ng, hơpăh tơmam ăn anih tơgŭm jên pơm 15 tơmam, pơjao hla ar chih tơbăt ăn dôm bơngai vang thi.