VOV4.Bahnar - ‘Năr 25/8, tơ̆ xăh Đắk Phơi, apŭng Lắk, Anih vei lăng jŏh ayŏ kơ dŏ xoang, tơ plŏng kơ dâu păng chă tơ mang lăng dêh char Dak Lak jang hơ doi hăm Anih jŏh ayŏ kơ dŏ xoang, tơ toi tơ băt apŭng Lắk păng Dơ nŏ anih vei lăng kon pơ lei xăh Đắk Phơi pơ gơ̆r tơ ƀôh dơ̆ng tơ drong Lêh et pơm ‘nhŏng ŏh đơ̆ng bơ ngai Mnông Gar. ‘Nâu jĭ 1 lơ̆m dôm tơ drong đei lơ̆m tơ drong jang “Chĕp vei păng tưk tơ iung kơ jă kăp gĭt đơ̆ng tơ drong juăt tôn chĭng chêng tơ̆ dêh char Dak Lak” yoa Anih jang hơ doi hăm apŭng plenh tĕh dêh char Jeollabuk-do, Hàn Quốc tơ gŭm.

Ƀok pơ jâu soi ăn 2 ‘nu tơ mŏm pơm ‘nhŏng ŏh

Tơ drong lêh đei pơ gơ̆r tơ̆ hnam ƀok Y Thiêng Cil tơ̆ plei Jiê Yuk, xăh Đắk Phơi, apŭng Lắk, dêh char Dak Lak, et pơm ‘nhŏng ŏh hăm ƀok Y Nam Pan Ting hơ dai lơ̆m pơ lei. Ƀok Y Thiêng Cil hăm ƀok Y Nam Pan Ting jĭ boăl juăt lơ sơ năm ‘nâu. Tơ drong lêh đei pơm kiơ̆ 5 hơ yak, hăm 2 tơ drong soi tơm ‘nŏh jĭ soi ăn jơ hngâm pran, roi tơ băt ăn yang găh tơ drong pơm pô̆ đơ̆ng 2 unh hnam păng tơ drong pơ gơ̆r et xa hơ dai đơ̆ng 2 unh hnam tơ mŏm băl.

Jơ sŏng xa hơ dai đơ̆ng 2 unh hnam et pơm pô̆ hăm tơ drong dơ̆ng lăng đơ̆ng rim bơ ngai

Lơ̆m jơ pơm lêh, jơ va chĭng Bor hơ nơ̆ng đei tôn, đe hơ druh tơ dăm hơ xoang hơ iă păng vang dơ̆ng lăng tơ drong et pơm pô̆ đơ̆ng 2 unh hnam. Đơ̆ng rŏng kơ lêh âu, đơ̆ng ưh đei kơ tŭm kơ tŏng ‘nhŏng ŏh kiơ, dang ei 2 unh hnam jing ‘nhŏng ŏh 1 hnam, oei xa jê̆ băl, tơ gŭm băl mưh đei tơ drong mơ mat tat, hơ nat hơ not, ưh đei jô̆ kŏng, jô̆ năr mưh chă tơ gŭm băl.

Dơ̆ng: Tơ blơ̆