Vang akŏm lăm pơhrăm đei hloh 50 ‘nu bơngai hŏk ‘noh jĭ dôm bơngai jang tơdrong jang tơmang lăng tơ̆ dôm hơnih tơmang lăng, anih ƀĭch pơdơh ngôi homestay, dôm ŭnh hnam tơmơ̆t jên jang hơtŏk tơiung tơmang lăng choh jang sa, jang pơgar. Lăm pơhrăm vă tơgŭm, pơm tơdrong hiôk ăn khŭl bơngai jang lơ̆m tơdrong jang tơmang lăng hơtŏk ‘lơ̆ng đon hlôh vao, tơdrong gơh jang găh pơjing tơmam tơmang lăng ‘lơ̆ng hơdrô̆; tơgop pơm dơ̆ng lơ tơmam tơmang lăng ‘lơ̆ng, ‘nao hlĭch, hơiă vă sơng đei tơmoi tơmang lăng truh hăm Dak Lak.

Yă Nguyễn Thụy Phương Hiếu, Phŏ kơdră Anih vei lăng găh joh ayŏ - tơplŏng kơdâu păng tơmang lăng Dak Lak tơbăt, lăm pơhrăm bơ̆jang kiơ̆ trong tơlĕch jang pơhrăm rim sơnăm kiơ̆ lơ̆m Tơdrong jang hơtŏk tơiung tơmang lăng kơ dêh char đei Anih jang Đảng dêh char Dak Lak tơlĕch ăn đơ̆ng sơnăm 2021.