Tơlĕch pơgơ̆r đơ̆ng khei 9 sơnăm sơ̆, ‘măng pơlong video clip hăm hơnăn “Tơdrong tơroi găh chehphe Buôn Ma Thuột" jĭ mĭnh lơ̆m dôm tơdrong pơgơ̆r kơ Pơm lêh chehphe Buôn Ma Thuột ‘măng mă 8, sơnăm 2023.

‘Măng mă blŭng đei pơgơ̆r, ‘măng pơlong hơvơn đei 21 phim đơ̆ng 19 ‘nu bơngai păng khul pơm phim lơ̆m dêh char Đak Lăk păng dêh char anai. Kiơ̆ đơ̆ng khul chĕp pơgơ̆r, rim phim vang năm pơlong tôch ‘lơ̆ng hơ iă, tơƀôh tơbăt hơdăh tơdrong yan au lơ̆m tơring Tây Nguyên. Khul hlôi rơih păng pôk ăn tơmam hơpăh ăn 7 phim ‘lơ̆ng hơ iă hloh, đei 1 tơmam hơpăh dơ̆ng mă blŭng, 1 tơmam hơpăh dơ̆ng mă 2, 1 tơmam hơpăh dơ̆ng mă 3, 3 tơmam hơpăh pơchhơp jơhngơ̆m păng 1 tơmam hơpăh kơ yuơ bơngai lăng rơih.