Đơ̆ng pơgê hrôih, tơ̆ anih jang joh ayŏ păng tơroi tơbăt apŭng Ea Hleo, dêh char Đăk Lăk akŏm lơ bơngai chơt hơ-iă ‘nă hal. Rim tơdrong đei axong tơ̆ dôm anih phara băl nhen: anih ‘măn săch păng tơmam drăm STEM, anih pơdăh um rŭp kiơ̆ hơnăn pơkăp, anih akŏm găh săch păng tơdrong đŏk hơlen, akŏm tơroi kơ bơngai chih tak phâm păng tơdrong pơlong tơroi kiơ̆ săch. Rim tơring adoi đei lơ hŏk tro, bơngai pơtho păng mĕ ƀă hŏk tro chă akŏm đŏk hơlen. Chơt hơ-iă chĕp lơ̆m ti tơmam ‘nao đei hơpăh, oh Bùi Trần Bảo Thư, hŏk tro lăm 6A5, hnam trưng THCS Lê Quý Đôn, thĭ trâ̆n Ea Drăng, apŭng Ea Hleo tơroi: Đơ̆ng pơgê truh dang ei inh lăng đe pơdăh joh hơri, iŏk săch, pơma dơnuh atŭm hăm duch pơgơ̆r hnam joh ayŏ, păng pơxuh pơchơt, chă pơhrăm găh tơdrong đŏk hơlen. Lơ̆m dôm tơdrong akŏm, inh lăp hloh noh tơdrong pơxuh pơchơt, hơlen găh joh ayŏ kơlih hăp đei lơ tơdrong ‘lơ̆ng, păng chơt dơ̆ng. Inh ‘meh hnam trưng pơgơ̆r lơ tơdrong akŏm păng pơchơt ăn đe boăl pơxuh lơ̆m khul vă hlôh vao lơ hloh dơ̆ng.

Ưh adrô̆ đei akŏm lơ̆m dôm tơdrong pơchơt ‘lơ̆ng, đe hŏk tro vang akŏm oei đei axong ăn lơ săch găh joh ayŏ ăn đe hơ-ioh. Dôm tơdrong tơroi đơ̆ng tơmoi chă hơvơn pơma dơnuh tơgŭm ăn đe hŏk tro hlôh vao hơdăh hloh găh tơdrong kăp gĭt đơ̆ng chă đŏk săch, đơ̆ng noh đei oh nhan hloh hăm tơdrong đŏk hơlen tơdrong hlôh vao kiơ̆ đơ̆ng săch. Oh  Phan Thị Phương Thúy, hŏk tro lăm 9A, hnam trưng hŏk tro kon kông hŏk oei hadoi apŭng Ea Hleo tơroi: Inh tơmơ̆ng dôm bơngai chih pơđơ̆k, chih văn pơma ‘lơ̆ng tơpă păng pôk bơnê kơ đe duch ma noh. Đei lơ khul ‘lơ̆ng, tơroi kơ Ƀok Hô măh vơch kơ jơhngơ̆m. Inh ƀôh klưh yom păng hơpơi ‘meh kơdih inh adoi thoi noh mơ̆n. Inh ưh gan đŏk săch kơlih ưh gan lăp ôh, mă lơ noh inh đŏk hơlen săch găh đon bơnôh, oei săch văn hŏk noh inh ưh gan đŏk ôh. Mă lei dang ei tơmơ̆ng đe duch ma tơroi noh inh hơtŏk đon lăp hloh, inh lăp kơ săch hloh păng lăp kơ nơ̆r pơma pơđơ̆k hloh.

Kiơ̆ kơ ƀok Nguyễn Huy Dũng, Kơdră anih Joh ayŏ Tơroi tơbăt apŭng Ea Hleo, noh pơm kiơ̆ Năr săch păng tơdrong đŏk hơlen xơnăm 2023, tơring hlôi đei tơlĕch lơ tơdrong jang. Hơdăh nhen: pơtơm pơgơ̆r Năr akŏm hăm hơnăn “Săch păng đe mơlôh”; pơdăh, axogn ăn boăl đŏk 2.500 kơsâ̆p săch hăm lơ kơluăi nhen: Săch văn hŏk hơ-ioh, săch khua hŏk, săch đŏk hơlen; săch pơtho găh tơdrong hơrih, săch khua hŏk kih thuơ̆t, khôi luơ̆t, y hŏk, săch ƀăo. Pơdăh um hơnăn “Ea H’leo ‘lơ̆ng rŏ”; Pơgơ̆r dôm tơdrong pơxuh kră xơ̆; pơđă pơchơt đei hơpăh; akŏm pơma dơnuh hăm dôm bơngai chih văn, chih pơđơ̆k; pơlong tơroi kiơ̆ săch... Tơdrong akŏm đei lơ bơngai tơrĕk akŏm đơ̆ng jê̆  1.000 ‘nu hŏk tro păng bơngai pơtho tơ̆ dôm hnam trưng THCS, THPT lơ̆m jâ̆p apŭng. Atŭm hăm noh, apŭng duh tơrĕk truh đe hŏk tro tơring tơnap tap hăm lơ tơdrong pơgơ̆r pơlong, pơlan xă tơdrong dŏk hơlen tơ̆ dôm hnam trưng. Ƀok Nguyễn Huy Dũng ăn tơbăt: Nhôn oei vă tơlĕch pơlan xă truh rim hnam trưng, rim tơring, lơ̆m noh chă axong săch ăn dôm thư viê̆n adoi nhen tơgop săch axong ăn đe mon đei tơdrong hơrih tơnap tap noh tơdrong jang âu gô pơdui lơ̆m khei 4 âu păng khei năr đơ̆ng rŏng kơ noh

‘Nhăk săch truh tơpang ti đe hŏk tro tơring ataih yaih adoi jing minh lơ̆m dôm tơdrong jang hơdăh hloh đơ̆ng Jơnŭm jang Văn hŏk ngê̆ thuơ̆t Đăk Lăk pơm kiơ̆ Năr săch păng tơdrong đŏk hơlen xơnăm âu. Yă Niê Thanh Mai, Kơdră Jơnŭm jang ăn tơbăt, pơm kiơ̆ tơdrong pơkăp đơ̆ng Jơnŭm bơngai chih văn Việt Nam, Jơnŭm jang Văn hŏk ngê̆ thuơ̆t Đăk Lăk hlôi axong kơ hrĕng kơsâ̆p săch văn hŏk ngê̆ thuơ̆t lơ̆m pơkăp vă jang “Axong săch văn hŏk ngê̆ thuơ̆t ăn đe hơ-ioh tơring ataih yaih” păng pơgơ̆r lơ tơdrong akŏm, pơma dơnuh hăm bơngai chih săch. Yă Niê Thanh Mai hơpơi ‘meh, kiơ̆ đơ̆ng noh, đe hŏk tro gô đei tơrĕk tơjê̆ hloh păng lơ hloh hăm săch, đơ̆ng noh gô ‘măn lơ jơ hloh ăn tơdrong đŏk săch, hơlen băt lơ̆m rim tơdrong chih kiơ̆ hlak săch: ‘Nhăk săch truh hăm tơring ataih yaih păng đei dôm tơdrong axong săch adoi nhen dôm tơdrong jang vă pơlan xă găh đon lăp kơ săch hăm đe hŏk tro tơring ataih yaih. Mă kăl xơnăm âu hăm pơkăp vă jang săch axong ăn đe hơ-ioh tơring ataih yaih, tơring kon pơlei kon kông noh Jơnŭm bơngai chih văn Việt Nam hlôi pơtruh 4.000 kơsâ̆p săch tơ̆ Đăk Lăk păng atŭm hăm Jơnŭm jang Văn hŏk Ngê̆ thuơ̆t Đăk Lăk hlôi truh dôm hnam trưng tơ̆ lơ tơring teh lơ̆m apŭng, mă kăl noh tơrĕk truh dôm hnam trưng hŏk lơ̆m dôm pơlei pơla mă đei hŏk tro kon kông.

Ưh adrô̆ lơ̆m tơdrong jang pơm kiơ̆ Năr săch păng tơdrong đŏk hơlen, tơdrong ‘nhăk săch truh rim hnam trưng, mă hăt noh dôm hnam trưng tơring ataih yaih tŏk bŏk đei lơ anih jang tơ̆ Đăk Lăk tơlĕch jang kiơ̆ dôm tơdrong pơkăp vă jang Thư viê̆n lưu đŏng, Tơ̆k hơdăh tơdrong hlôh vao, Hnam trưng jơ̆ng ‘năr. Kiơ̆ đơ̆ng noh, tơchơ̆t chă pơtrŭt păng hơtŏk hlôh vao găh đŏk hơlen lơ̆m tơpôl, pơjing tơdrong juăt đŏk săch, tơgop hơtŏk tơdrong đŏk hơlen roi năr đei jơnei kăp gĭt hloh.