Lơ̆m hnam kơ jung kơ ‘nhŏng Y Wôn Knul (ƀă Nhiên), oei tơ̆ plei Ako Dhông, pơlei tơm Buôn Ma Thuột, mĭnh grŭp hơdruh tơdăm vă jê̆ jĭt ‘nu tŏk bŏk chơt hơiă pơhrăm tôn reh păng hơri hơ ‘mon. ‘Nhŏng Y Wôn Knul tơbăt, roi ‘năr roi lơ tơmoi truh tơ̆ Buôn Ma Thuột ‘meh mơ̆ng lăng đe tôn reh bơ̆n chĭng chêng, tĭng nĭng, chĭng klơk, chă hơlen lăng tơdrong joăt joe Ê Đê. Mă loi ‘noh, lơ̆m năr lêh cheh phe vă jê̆ truh, anih jang pơm tơmang lăng hlôi pơkă năr tôn reh tơ̆ hnam: Hơmet ăn lêh ‘noh ‘nhŏng oh kŭm đei dôm khei ‘năr vă tơ oei dơ̆ng hăm băl, pơtâp tôn chĭng chêng dăh mă tôn reh truh tơ̆ dôm ƀai hơri  k’kưt, khan, găh tơmam tôn reh kơ Tây Nguyên, găh ƀai chĭng chêng pơma atŭm ‘noh nhen chêng ne, chĭng klơk ne, đing buốt, đing năm ne, ƀai k’kưt khan ne, vă kơ sư ‘lơ̆ng ƀiơ̆, vă kơ roi tơƀôh tôm tơdrong joh ayŏ đơ̆ng bơ̆n păng bơ̆n kŭm pơ ‘lơ̆ng hăm dôm bơngai răp mơ̆ng găh tơdrong ‘noh.

Jĭ hơnih tơmang lăng ‘lơ̆ng hơiă tơ̆ pơlei tơm Buôn Ma Thuột, dôm năr âu, plei Ako Dhông tŏk bŏk đei pơm pơ rŏ ming dơ̆ng lơ tơmam vă pơ vih pơvăn dôm tơdrong jang đơ̆ng lêh. Kŭm hăm hơmet anih jang tơmam ƀĭch pơdơh ngôi homestay păng tơmam pai sa, dôm ŭnh hnam lơ̆m pơlei oei pơm hơmet ming dơ̆ng hnam kơ jung, hơmet pơ rŏ ‘măng jang, dur var, tơ sơng ming bơ̆n kơ ƀang tơroi, kơ ƀôh tơƀôh trong vă tơgŭm tơmoi hiôk ƀiơ̆ lơ̆m kơplăh năm chă lăng lơ̆m pơlei. Mŏ H Tít Aliô, oei tơ̆ plei Ako Dhông tơroi, ŭnh hnam sư hlôi tơ hoach vă jê̆ 400 triệu hlak jên pơm hơmet ming hnam kơ jung kơ ŭnh hnam, hơmet tôm vă tơgŭm sơng tơmoi mưh đei dôm khŭl năm chă lăng, et sa. Mŏ H Tít Aliô tơroi: Pơyan lêh âu sư ƀơm truh ưh khan lăp hơdrô̆ cheh phe mă sư oei jing joh ayŏ kơ bơngai Ê Đê tơ̆ Buôn Ma Thuột kơna pơlei pơla tôch kơ chơt hơiă păng ‘nă hal chang gô. Ĭnh ƀôh ‘noh jĭ pơlei pơla hơiă hloh ƀiơ̆, tŏk bŏk tơgŭm băl hơmet ăn jăh đang păng vă pơvih pơvăn ăn pơyan Festival cheh phe âu. Pơlei pơla đei dôm tơdrong jang ‘noh tôn chĭng chêng, tơmam sa, đei huch phe đĕch dơ̆ng. Lơ̆m pơlei ‘noh đei ŭnh hnam Ay Ray, Tăng Bi, hơnih mơdro sa huch chehphe A Rul, hơnih mơdro huch cheh phe Ako Dhông đe sư kŭm tŏk bŏk hơmet ăn tơtĕnh ăn Festival ‘măng âu.

Tơ̆ dôm pơlei pơla lơ̆m dêh char Dak Lak, kon pơlei kŭm hơmet tôm tơdrong jang kiơ̆, pơm lơ dơ̆ng tơdrong joh ayŏ kơ lêh cheh phe, nhen pơgơ̆r Năr Joh ayŏ - tơplŏng kơdâu kơ dôm hơdrĕch hơdrŭng, pơgơ̆r dôm tơdrong soi tơbeh joăt joe nhen soi kơ đak tơnglang, soi kơ jơhngơ̆m jăn, soi kơ jơhngơ̆m pran ăn kơ rôih... Kiơ̆ kơ ‘nhŏng Y Thiên Adrơng, tơ ‘ngla 1 anih jang pơm tơmang lăng tơ̆ pơlei tơm Buôn Ma Thuột, sư hlôi pơm dôm ‘măng tơmang lăng ‘lơ̆ng hơiă pơlei pơla vă tơmoi đei tơdrong hiôk gơh lăng tơdrong joh ayŏ, tơƀơ̆p kơtă hăm kon pơlei - tơ ‘ngla joh ayŏ tơ̆ rim pơlei pơla: Kiơ̆ rŏk tơdrong jang đơ̆ng lêh cheh phe ‘noh gô đei dôm tơdrong jang tơ̆ Buôn Ma Thuột, tơdrong jang tơ̆ Lắk păng tơdrong jang tơ̆ Buôn Đôn. Mĭnh tơring gô đei tơdrong ‘lơ̆ng hơiă hơdrô̆, rim hơnih mă tơmoi năm brih ‘noh jĭ bơ̆n gô lê̆ ăn tơmoi đei tơƀơ̆p pơma dơnuh, đei lăng băt găh kơ tĭnh kon bơngai, tơdrong hơiă, dôm tơdrong ‘lơ̆ng tơ̆ rim tơring kon kông, rim pơlei pơla. Nhôn gô tơgoăt hăm dôm kon pơlei đe sư tŏk bŏk arih sa tơ̆ noh, vă kơ đe sư vang tơroi dôm tơdrong đơ̆ng đe sư ăn tơmoi tơmang lăng.

Lêh cheh phe Buôn Ma Thuột ‘măng mă 8 âu đei lơ kon pơlei tơ̆ Dak Lak chhôk hơiă răp gô. Lơ̆m tơdrong chơt hơiă “ Khei pêng Tây Nguyên”, dôm pơlei pơla hlôi hơmet tôm tơdrong vă vang pơm đei 1 năr lêh ƀĕnh tơdrong hơ iă cheh phe păng lơ tơdrong joh ayŏ.