VOV4.Bahnar - Tơ̆ xăh Ea Tar, apŭng Cư Mgar, dêh char Dak Lak, Anih vei lăng găh joh ayŏ - tơ plŏng kơ dâu păng tơ mang lăng Dak Lak pơ gơ̆r pơm tơ iung ming dơ̆ng lêh pơm ‘nhŏng oh kơ bơ ngai Ê Đê vă tơ iung ming dơ̆ng păng tơ ƀăk mong dôm tơ drong ‘lơ̆ng hơ iă kơ dôm hơ drĕch kon kông tơ̆ tơ ring. Tơ drong lêh pơm tơ̆ hnam yă H Djuăn Niê, tơ̆ plei Drai Sí, xăh Ea Tar, apŭng Cư Mgar, pơm mŏ oh hăm ƀok Y Thôn Niê. Tơ drong lêh đei pơ gơ̆r kiơ̆ joăt joe hăm 3 ‘măng soi, tơ mam soi ‘noh đei 7 tŏ tơ drô ge, 1 pôm nhŭng kreo păng 2 tŏ iĕr, đei tơ drong vang akŏm păng dơ̆ng lăng đơ̆ng lơ lap mih ma duch nă kơ tom kơ tŏng 2 păh ŭnh hnam.

Anih vei lăng joh ayŏ - kơ dŏ soang păng tơ mang lăng dêh char Dak Lak tơ băt, tơ drong pơm tơ iung ming dơ̆ng tơ drong lêh ‘noh jĭ 1 lơ̆m dôm tơ drong jang kơ dêh char vă tơ iung ming dơ̆ng dôm tơ drong lêh joăt joe kơ dôm hơ drĕch kon kông kơ tă anih tơ̆ hơ năp hơ mơt kơ hiơt hiong, tơ gop vei răk păng tơ ƀăk mong dôm kơ jă kăp gĭt tơ drong tôn chĭng chêng tơ̆ tơ ring.

Thuem: Tơ blơ̆