Mă hơdăh, lăm pơtho hơ ri hơ ‘mon đei 20 ‘nu hŏk bơngai Êđê tŏk bŏk arih sa tơ̆ xăh Ea Tul vang hŏk. Lăm pơhrăm pơtho hơ ri pơ đơ̆k đei 25 ‘nu hŏk bơngai Êđê arih sa tơ̆ xăh Cuôr Dăng vang hŏk. Lơ̆m dang 2 khei, bơngai hŏk đei dôm  nghệ nhân tơ roi, pơ tho găh trong hơ ri hơ ‘mon, hơ ri pơ đơ̆k kơ bơngai Êđê.

Tơ roi 1,2 ƀai hơ ri hơ ‘mon, ƀai hơ ri yua nơ̆r pơ đơ̆k oei đei chĕp vei păng iŏk yua hrei ‘nâu. Hơdai hăm ‘noh, Anih vei lăng găh Joh ayŏ - Tơplŏng kơdâu păng tơmang lăng oei pơ jao asong hơ mrŭk chĭng chêng păng hơbăn ao tanh Êđê ăn kơ 1,2 pơlei lơ̆m 2 xăh. Bơ̆jang chă mong akŏm păng chih hơmet, in tơlĕch hla ar nơ̆r pơ đơ̆k vă vei răk, tơƀăk mong kơ jă kăp gĭt tơdrong kră sơ̆ lơ̆m dôm sơnăm đơ̆ng rŏng dơ̆ng.