Plei Dơng Bắk, xăh Yang Tao, apŭng Lắk, dêh char Đắk Lắk đei năng jĭ 1 pơlei tơ̆ Tây Nguyên oei chĕp vei tơdrong jang so, pơm bô̆i đơ̆ng bơngai M’nông R'lâm. ‘Nâu jĭ tơdrong jang đei đơ̆ng chăl kră sơ̆ kơ bơngai Mnông, pơm hăm ti ngăl, đơ̆ng tŭl, pĕt tĕh, truh man hơli, sơ̆k păng ƀuh. Hrei ‘nâu tơdrong jang ‘nâu sơng đei lơ tơmoi truh lăng, pơm thư lăng. Mă lei dang ei pă 1,2 ‘nu bơngai kră oei gơ̆h pơm đĕch, tơtă đe drŏ kăn ngăl.

Lăm pơtho pơm bô̆i bơngai Mnông đei pơih hăm kơsô̆ jên đơ̆ng Tơdrong jang chĕp vei, tưk tơiung kơjă kăp gĭt đơ̆ng tơdrong juăt ‘lơ̆ng đơ̆ng dôm hơdrĕch kon kông tơklep hăm atŏk tơiung chă tơmang lăng găh Tơdrong jang tơm kơ tĕh đak atŏk tơiung mŭk drăm, tơpôl tơ̆ tơring kon kông păng groi kông đơ̆ng 2021-2030. Vang hŏk đei 20 ‘nu bơngai ‘nŏh jĭ đe drŏ kăn bơngai Mnông tơ̆ plei Dơng Bắk, xăh Yang Tao. Dôm bơngai kiơ̆ hŏk đei pơhrăm rim tơdrong vă gơ̆h pơm đei bô̆i ‘lơ̆ng.