‘Nâu jĭ ‘măng mă 2 lăm pơtho tôn chĭng chêng ăn sinh viên đei pơgơ̆r tơ̆ hnam trưng đại học Tây Nguyên. Lăm pơgơ̆r pơtho đơ̆ng ‘năr 5/10 âu ki hăm 30 ‘nu bơngai hŏk ( đei 5 ‘nu drŏ nglo păng 25 ‘nu drŏ kăn) jĭ sinh viên kơ hnam trưng đại học Tây Nguyên vang hŏk. Lơ̆m hloh 1 khei, lơ̆m dôm gơmăng năr drou păng năr pơh, dôm bơngai hŏk đei 2 ‘nu bơngai pơtho tôn chĭng kram păng chĭng hu; hơri brông păng tôn 1,2 ƀai chĭng chêng kơ dôm hơdrĕch Êđê, Bana.

Kŭm hăm ‘noh, khŭl pơgơ̆r oei tơgep dôm tơdrong chă hơlen lăng joh ayŏ păng băt tôn chĭng chêng hơdai hăm hơri brông, hơsoang. Pơgơ̆r ăn kơ bơngai hŏk vang akŏm lơ̆m năr lêh, tôn, hơri hơsoang, tơgoăt pơvih pơvăn ăn tơpôl tơ̆ hnam trưng, Hơnih vei lăng joh ayŏ dêh char păng hnam trưng Đại học Văn Lang (pơlei tơm Hồ Chí Minh).