Atŭm hăm ‘noh, lơ̆m khei ‘năr Pơm lêh chehphe Buôn Ma Thuột ‘măng mă 8 truh au kơnh, rim tơdrong pơlong rôih kơdau, rôih glơi, đă ƀŏng lŏng jei pă đei pơgơ̆r bơih. Kiơ̆ đơ̆ng Hơnih bơ̆ jang vei lăng tơmang pơ hiơ păng khách sạn Biệt Điện (tơ̆ pơlei tơm Buôn Ma Thuột, Đắk Lắk) tơbăt, đơ̆ng năr 10/2, hơnih au pơdơh hloi tơdrong ăn đe yŭn rôih tơ̆ hơnih tơmang pơ hiơ̆ Gơng hơneh Buôn Đôn kơ tơring Krông Na, apŭng Buôn Đôn; tơplih hăm tơdrong pơgơ̆r tơmang pơ hiơ̆ anai tơklep hăm tơdrong tơmang pơ hiơ̆ ‘lơ̆ng hơ iă hăm rôih nhen ăn rôih chă yak, chă pơchơt hăm tơmoi.

Tơchơ̆t au vă jang kiơ̆ trong tơlĕch jang đơ̆ng dêh char Đak Lăk găh trong tơmang pơ hiơ̆ pơdơ̆h ăn yŭn rôih lơ̆m bơ̆ jang tơmang pơhiơ̆ vă vei lăng năng tông rôih rong kơ dêh char, tơplih ăn tơmang lăng rôih hơ iă. Jei đei ƀơm truh tơdrong au, lơ̆m tơdrong pơgơ̆r Pơm lêh Rôih Buôn Đôn-mĭnh tơdrong pơgơ̆r đei tơlĕch pơgơ̆r lơ̆m Pơm lêh chehphe Buôn Ma Thuột ‘măng mă 8, sơnăm 2023 pơgơ̆r lơ̆m khei 3 tơ̆ Đak Lăk, gô pă đei pơgơ̆r rim tơdrong pơlong rôih kơdau, rôih glơi, đă ƀŏng lŏng, pă đei pơlong rôih tơdui hăm bơngai. Tơplih lơ̆m noh gô đei pơgơ̆r mĭnh ƀar tơdrong anai nhen: Soi tơbeh ăn kơ rôih pran jăng grăng akau, ăn rôih vang năm pơgơ̆r buffet, pơlong pơrŏ ăn kơ rôih ‘lơ̆ng, pơlong ăn kơ rôih kuh ka hla bat ăn tơmoi, ăn rôih oei tơjê̆ păng phĭn rup hăm tơmoi.