Kiơ̆ Anih vei lăng jŏh ayŏ kơdŏ xoang – Tơplŏng kơdâu păng chă tơmang lăng Dak Lak, jô̆ truh ‘năr (26/1), vă akhan ‘năr 5 Têt Nguyên đán, dêh char Dak Lak sơng đei 130 rơbâu ‘nu bơngai chă tơmang lăng, mă lơ ‘nŏh jĭ bơngai lơ̆m tĕh đak. Akŏm đĭ đăng jên đei iŏk yoa đơ̆ng chă tơmang lăng truh 14 ti, tŏk hlŏh 1 puăt pơtêng hăm khei âu sơnăm sơ̆. Tơ drong iŏk yoa lăm, anih tĕp đei hlŏh 55%.

Kiơ̆ ƀok Lại Đức Đại, Phŏ Kơdră vei lăng jŏh ayŏ kơdŏ xoang, tơplŏng kơdâu păng chă tơmang lăng dêh char Dak Lak, đơ̆ng hơdrol kơ têt dôm tơring lơ̆m dêh char hlôi hơtŏk tơdrong dăr lăng, hơmet pơ ‘lơ̆ng dôm anih chă tơmang lăng păng dôm tơmam pơyoa ăn tơdrong chă tơmang lăng vă pơvih ‘lơ̆ng hlŏh ăn tơmoi. Dôm anih tĕch mơdro tơmam sŏng xa, đak nhă păng anih tep pơdơ̆h chih hơdăh kơjă tơmam păng tĕch trŏ kơjă, ưh đei tơdrong pơjoă tơmoi. Mă loi, ƀât têt Nguyên đán sơnăm ‘nâu, ‘năr rŏ tŏ hơđơ̆ng, dôm tơdrong jŏh hơri hơxoang, ngôi pơchơt tơ̆ dôm tơring vang tơgop sơng đei lơ tơmoi truh ngôi tơ̆ Dak Lak.