Lơ̆m noh dang 12% jĭ tơmoi apŭng plĕnh teh. Akŏp thu iŏk đơ̆ng tơmang lăng jô̆ pơhlom iŏk đei 824 ti hlak jên, yak hloh 50 ti hlak jên pơtêng hăm trong tơlĕch jang kơ pơđĭ sơnăm 2022. Tơmang lăng Dak Lak hlôi tơtĕnh tơiung ming đơ̆ng rŏng kơ jĭ covid-19 đei vei lăng. Ƀôh atŭm đơ̆ng tơmoi ‘noh jĭ rơih iŏk dôm hơnih tơmang lăng ‘nao, plơ̆ng, đei lơ tơdrong lăng pha, hlĭch, kơna rơih dôm hơnih năm truh tơ̆ Dak Lak.

Yă Nguyễn Thụy Phương Hiếu – Phŏ kơdră chĕp kơ̆l Anih vei lăng găh joh ayŏ tơplŏng kơdâu păng tơmang lăng dêh char Dak Lak tơbăt, dêh char tŏk bŏk hơnơ̆ng đei dôm trong jang tơgŭm dôm anih jang, kơdih hơtŏk tơiung tơmang lăng, lơ̆m noh mă loi ‘noh jĭ lăng kăl hơtŏk tơiung tơmang lăng tơpôl hăm vei răk joh ayŏ dôm hơdrĕch kon kông. Lơ̆m jăl jang 2021 – 2025, dêh char hlôi rơih tơmơ̆t jên jang ăn 5 pơlei kơ bơngai kon kông, hăm kơsô̆ tơgŭm đơ̆ng 800 – 1 ti hlak jên vă hơtŏk tơiung tơmang lăng.