Ƀok Lại Đức Đại, Phŏ Kơdră vei lăng jŏh ayŏ kơdŏ xoang, tơplŏng kơdâu păng chă tơmang lăng dêh char Dak Lak ăn tơbăt: Đơ̆ng sơnăm 2019, Lêh Bơnê kơ đe linh kăch mang tơ̆ Hnam phak Buôn Ma Thuột jing tơdrong jang đei pơgơ̆r hơnơ̆ng rim sơnăm vă đe kăn ƀô̆, đảng viên păng kon pơlei dôm hơdrĕch hơdrung lơ̆m dêh char tơƀôh jơhngâm đon ‘mêm bơnê tôch ai hăm kŏng tih tên đơ̆ng đe linh cộng sản đei rôp kron, lôch hơchăng tơ̆ Hnam phak Buôn Ma Thuột sơ̆.

‘Nâu kŭm jing “anih ƀrê” ăn kon pơlei păng tơmoi chă tơmang lăng truh hơlen năng jơhnơr arih adrol sơ̆. Kiơ̆ đơ̆ng nŏh, pơtho tơƀôh đon tơchĕng, chinh trĭ găh tơdrong juăt jang kăch mang đơ̆ng khul linh păng kon pơlei bơ̆n, tơgop hơtŏk tơdrong tơguăt 1 ƀơ̆r đon, hưch hanh kơ hơdrĕch hơdrung vang adrin pơjing pơlei pơla, tĕh đak roi đunh roi gơ̆h hơgei, pơdrŏng, ‘lơ̆ng rŏ.