Tơdrong lêh đei pơgơ̆r hăm lơ tơdrong jŏh ayŏ kơdŏ xoang ‘lơ̆ng hơiă, lơ tơdrong pơm ngôi ‘măn ăn kon pơlei păng tơ moi truh tơmang lăng. ‘Nâu jĭ tơdrong jang đei pơgơ̆r hơnơ̆ng rim sơnăm vă vei kơjăp păng tưk tơiung tơdrong jŏh ayŏ kơdŏ xoang kơ dôm hơdrĕch hơdrung Việt Bắc truh oei xa tơ̆ Tây Nguyên.

Đơ̆ng sơnăm 2010, tơdrong lêh Jŏh ayŏ kơdŏ xoang Việt Bắc đei pơgơ̆r hơnơ̆ng ƀât năr pơnil khei mônh rim sơnăm hăm lơ tơdrong tôch hơiă nhen: Soi kơ yang tĕh vă apinh yang tơjur ăn pơyan choh jang xa đei iŏk yoa kơjăp, thi pơm kơtrăi, pơm ƀĕng chưng – ƀĕng dày, prung pơlăh đing, thi ƀuh nhŭng kuay – pai tơdrô. Tơdrong ngôi pơchơt đei lơ tơdrong pơm ngôi đơ̆ng krăsơ̆ nhen: dui băl, tŭn ‘long, kơdâu hăm ‘long sơng, klơ̆m plei kon, sơng đei lơ bơngai truh lăng, ngôi pơchơt.