Năr lêh vă kơ kuh chơt hơiă tơbăt 133 sơnăm năr rơneh kơ ƀok Kơdră Hồ Chí Minh (19/5). Vang truh akŏm năr lêh đei hloh 400 ‘nu nghệ nhân, bơngai hơri hơ soang păng dôm bơngai pơ long đơ̆ng dôm hơdrĕch kon kông arih sa tơ̆ dôm xăh, thị trấn lơ̆m apŭng.

Pơgơ̆r lơ̆m 2 năr ‘năr 09 păng 10 khei 5, năr lêh đei lơ tơdrong jang hơiă nhen: Pơm tơƀôh dơ̆ng dôm tơdrong lêh kră sơ̆ kơ tơpôl dôm hơdrĕch kon kông lơ̆m apŭng; tôn chĭng chêng păng dôm tơmam tôn reh kon kông; pơm hnam kră sơ̆ păng pơ dă tơmam ‘lơ̆ng kơ tơring; pơ long ‘long gơ̆ng păng môn tơplŏng kơ dâu kră sơ̆.

Nghệ nhân Y Ân (bơngai M’Nông) oei tơ̆ plei Phú Lợi, xăh Quảng Phú, apŭng Krông Nô, dêh char Dak Nông akhan, tơdrong pơgơ̆r năr lêh gô tơgop pơ jing, vei răk păng tơƀăk mong dôm kơ jă kăp gĭt ‘lơ̆ng hơ iă joăt joe kơ tơpôl dôm hơdrĕch kon kông lơ̆m apŭng.