Hop akŏm apŭng plenh tĕh găh Trôm hơgơp Kông unh ‘măng mă 20 sơnăm ‘nâu iŏk đei 28 hla ar chih khoa hŏk hăm lơ nơ̆r roi tơbăt, hla ar chih kăp gĭt găh kông unh păng trong hơgơp đơ̆ng kông unh tơ̆ lơ tơring lơ̆m apŭng plenh tĕh, tơgop ăn tơdrong jang atŏk tơ iung atŭm đơ̆ng Anih vei lăng trôm hơgơp Kông unh apŭng plenh tĕh.

Hop akŏm khoa hŏk “15 sơnăm atŏk tơ iung Groi tĕh gĭt kăl tơ̆ Việt Nam” kŭm iŏk đei 15 ƀai chih tơblang truh đơ̆ng dôm bơngai tang măt ‘nŏh jĭ Khul jang lơ̆m Anih vei lăng Groi tĕh kăp gĭt lơ̆m plei tĕh, Anih vei lăng Groi tĕh kăp gĭt kơ Châu Á - Thái Bình Dương păng dôm tĕh đak jang hơdoi nhen Nhật Bản, Hàn Quốc…; Tơdrong roi ăn băl dôm tơdrong jang đei, dôm ƀai hŏk kăp gĭt đơ̆ng dôm Groi tĕh kăp gĭt tơ̆ Việt Nam nhen Groi tĕh kăp gĭt kơ Tơmo lơ̆k Đồng Văn - Hà Giang, Groi tĕh kăp gĭt lơ̆m plei tĕh Kông thong đak Cao Bằng, Groi tĕh kăp gĭt Lạng Sơn. 

Hop akŏm oei dơ̆ng lăng lêh kĭ pơkăp Hla ar jang hơdoi đơ̆ng dôm Groi tĕh kăp gĭt lơ̆m plei tĕh tơ̆ Việt Nam nhen Groi tĕh kăp gĭt lơ̆m plei tĕh kơ UNESCO Dak Nông, Groi tĕh kăp gĭt kơ Tơmo lơ̆k Đồng Văn - Hà Giang, Groi tĕh kăp gĭt kơ plei tĕh UNESCO Kông thong đak Cao Bằng hăm Groi tĕh kăp gĭt kơ plei tĕh UNESCO Mudeungsan (Hàn Quốc).