Ƀơ̆t 'măng âu, 2 anih pơkăp mŭk drăm kăp gĭt tơ̆ Đăk Lăk đei Anih tơm Joh ayŏ, Tơplŏng kơdâu păng Tơmang pơhiơ̆ pơkăp jing Mŭk drăm joh ayŏ kăp gĭt kơ teh đak, đei “Khôi akŏm tơpôl păng đon lui kơ Et thơ thâu xơnăm erih kơ bơngai M’Nông apŭng Lắk” păng “Tơdrong kăp gĭt lơ̆m nơ̆r pơđơ̆k kơ bơngai Ê Đê apŭng Cư M’gar”. Thoi noh, atŭm hăm Khan (Hơ-'mon Êđê) hlôi đei tơchơ̆t ăh xơnăm 2014, truh dang ei Đăk Lăk hlôi đei 3 mŭk drăm đei pơkăp kơ teh đak.

Xơnăm âu dêh char Đăk Lăk oei đei 17 ngê̆ nhơ̆n oei erih păng 3 ngê̆ nhơ̆n hlôi lôch hơchăng đei ƀok Kơdră teh đak pôk ăn hơnăn Ngê̆ nhơ̆n ưu tŭ kơyuơ hlôi tơgop kăp gĭt lơ̆m tơdrong vei răk tơƀăk mong kơjă mŭk drăm joh ayŏ đon bơnôh kơ bơngai kon kông.