Tơ̆ Hop akom, Kơ iĕng Kơdră Hơnih vei lăng kon pơlei dêh char Dak Lăk Nguyễn Thiên Văn tơroi tơbăt găh dôm tơdrong đei, hơ iă kơ tơmang pơhiơ̆ Dak Lăk. Mă kăl ‘nŏh rim tour tơmang pơhiơ̆ ‘lơ̆ng rŏ hăm rôih, tơmang pơhiơ̆ kiơ̆ bri brăh, tơmang pơhiơ̆ pơlei pơla chă tơmang lăng tơdrong oei sa joh ayŏ kơ rim hơdrĕch hơdrung kơtă.

Kơdră tang măt teh đak Ấn Độ tơ̆ pơlei tơm Hồ Chí Minh, ƀok Madan Mohan Sethi tơbăt: Khul hơnih mơdro sa Ấn Độ hlôi păng tŏk bŏk iung năm tơƀơ̆p, pơtrŭt tơmang pơhiơ̆ tơ̆ lơ dêh char, pơlei tơm kơ Việt Nam. Ƀok Madan Mohan Sethi hơmĕng gô pơjing đei dôm hơyak pran kơjăp lơ̆m tơgoăt tơgoăl jang hơdoi ƀar păh 2 teh đak pơma atŭm, ƀar pah ƀang Kerala hăm rim dêh char, pơlei tơm kơ Việt Nam pơma hơdrô̆. Ƀlep lơ̆m jơ ‘năr au, tang măt ăn 2 păh hlôi kĭ pơkăp 11 hla bơar ƀlŏk hơdơ̆r jang hơdoi lơ̆m tơdrong jang ba tơmang pơhiơ̆ păng pơdơ̆h jơ̆ng.