Tơdrong kăl kơ tơroi ‘noh jĭ hơdrol sơ̆ plei Đăk Đe dai hlôi đei Rông pơm hơnih hôp akŏm tơpôl, mă lei đei pơm kiơ̆ trong chăl hle hăm găh lơ ‘noh tơmam ‘nao, lơ̆m kơplăh ‘noh Rông mă kon pơlei ‘nao pơm tơiung ming pơm kiơ̆ ƀlep thoi kră sơ̆ kơ bơngai Xơ Đăng Hà Lăng. Đei pơm lơ̆m hloh 2 khei, Rông plei Đăk Đe đei kơjung vă jê̆ 13m, tŏr  9,4m păng xă 5m. Vă pơm tơiung ming đei Rông kon pơlei đei tơgŭm vă jê̆ 100 triệu hlak jên đơ̆ng Tơdrong jang 6, Tơdrong jang tơm teh đak hơtŏk tơiung mŭk drăm tơpôl tơring kon pơlei kon kông păng tơring groi kông yua đơ̆ng Anih ‘măn răk tơmam drăm so - Thư viện dêh char Kon Tum tơlĕch jang bơ̆jang kiơ̆.

‘Ngoăih kơ ‘noh, rim ŭnh hnam kon pơlei plei Đăk Đe oei chă tơra kơdih đơ̆ng 200 rơbâu hlak jên tơ̆ kơpal păng tơgŭm đơ̆ng khŭl kơdră, grŭp tơpôl, anih jang pơm tơ̆ tơring. Akŏp jên vă pơm tơiung ming Rông hloh 150 triệu hlak jên păng kơhrĕng bơngai jang.

Jô̆ truh khei 8/ 2023 lơ̆m dêh char đei 437 lơ̆m akŏp kơsô̆ 503 pơlei bơngai kon kông đei Rông. Lơ̆m noh đei 213 Rông kră sơ̆, 224 Rông uơ oei dơ̆ng đei pơm kiơ̆ 1 puăt chăl hle păng chăl hle.

Dôm sơnăm tơ jê̆ âu tơdrong tơiung ming Rông kră sơ̆ kơ dôm hơdrĕch kon kông tơ̆ dêh char Kon Tum tơƀơ̆p lơ mơmat tat yua đơ̆ng tơmam joăt joe khăi păng hlôh vao pơm Rông kră sơ̆, mă hlôi lăp đei tơroi pơtho ăn kơ jơhnơr đơ̆ng rŏng kiơ̆ trong vang jang yan âu păng trong chă tơroi hăm ƀơ̆r lơ̆m tơpôl tŏk bŏk roi ‘năr roi hiơt hiong.