Đei ƀôh lơ hơnih pơm tơlĕch tơmam ngă đơ̆ng tơmo tơ̆ hơnih tơchă mŭk drăm kră sơ̆ Thác Hai‘Nâu jĭ tơdrong tơm đei roi tơbăt hơdăh tơ̆ hop akŏm roi tơbăt pơtôch sir iŏk tơmam drăm kră sơ̆ Thác Hai ‘măng mă 3 yua đơ̆ng Anih ‘măn răk tơmam drăm so Đắk Lắk pơgơ̆r kơsơ̆ (13/9). Hơnih tơchă mŭk drăm kră sơ̆ Thác Hai găh thôn 6, xăh Ia Jlơi, apŭng Ea Súp, dêh char Đắk Lắk, đei chă ƀôh blŭng sơnăm 2020.

Anih ‘măn răk tơmam drăm so Đắk Lắk hlôi jang hơdai hăm Anih ‘măn răk Jơhnơr hơrih teh đak sir iŏk 2 ‘măng lơ̆m dôm sơnăm 2021 păng 2022. Kiơ̆ đơ̆ng noh iŏk đei lơ tơmam kăp gĭt, ‘lơ̆ng hơiă, ‘măng mă blŭng tơchă ƀôh tơ̆ Tây Nguyên; lơ̆m noh đei “Iŏk akŏm tơmam koer tơmo Thác Hai” hlôi đei drơ̆ng ăn ‘noh jĭ Tơmam kăp gĭt kơ teh đak đơ̆ng sơnăm 2023.