Mih ma duch nă păng bôl boăl ‘nao mơ̆ng bơih Ngê̆ nhơ̆n Y-Djoan Mjâo 64 xơnăm, tơ̆ pơlei Wiâo, xăh Ea Hồ, apŭng Krông H’Năng, dêh char Dak Lak hlôm đing tartar. Đing tarta đei bơ̆ đơ̆ng minh đing kram kuer 3 tŏ pơlôh, minh păh kơ̆l đei pơngơ̆k ier đei chô̆ ăh kơđoh plui. Ngê̆ nhơ̆n Y-Djoan Mjâo ăn tơbăt: “Iŏk kram kră, minh plei plui, xal xut vă bơ̆ pơjing đing tartar. Athei kran kră noh jơva hăp gơh hiôk. Athei đei xal xut vă pơklep, hơyuh ưh đei lĕch tơ̆ ‘nguaih. Đing tartar le lăi hăm Buôt Chok hơnơ̆ng đei hlôm ăh hơri kưt pha hăm đing năm noh hlôm ăh đe hơri eirei. ‘Nâu jing minh tơdrong ‘lơ̆ng rŏ mă yă ƀok pơxư̆ răk ăn”

Vă bơ̆ pơjing đei đing tartar noh plui pĕ đei athei xơ̆k tơ̆ tô̆ lơ̆m 6 khei, pơhang ăh hơdra unh 1 xơnăm vă kơ hăp găm ‘lơ̆ng. Đơ̆ng rŏng kơ noh kuer 3 tŏ pơlôh ăh ƀơ̆r păng hơkâu plui, đang kơ noh chŭt kơmăt kram, iŏk xal xut pơklep pơhlơp vă ƀơ̆t hlôm ăh pơngơ̆k ier (bơ̆ hăm tơnanh kram đei chô̆ ăh ƀơ̆r plui) noh gô đei jơva re brông brŏng phara băl. Ngê̆ nhơ̆n Y-Djoan Mjâo ăn tơbăt: Bơ̆ tơmam pơre tơdra pơkăl athei đei tơdrong rơgei hơdjă noh mă gơh: “Vă vei ăn jơva brŏ tartar rim khei athei tơlĕch hlôm tŏ xĕt jat noh minh ‘măng. Đơ̆ng rŏng kơ hlôm noh athei kơtol mă bot ‘lơ̆ng. Đĭ đăng rim bơngai adoi gơh bơ̆ pơjing tartar, ưh đei tơklăh kră iĕ ôh, kơlih dôm bơngai mơlôh noh măt hơdăh hloh đe xư bơ̆ brŏ gô ‘lơ̆ng hloh”.

Jơva tartar hroh hrei noh hơnơ̆ng đei hlôm ăh pơgê hrôih vă pơdrĭu kon pơlei iung năm jang tơ̆ mir. Đơ̆ng xơ̆, đing tarta đei yua lơ̆m dôm kơmăng et xa, akŏm ăh kơmăng ang khei. Đe kră adoi lăp hlôm đing tartar hơri răh păng pơtho răh kon xâu, vă tơbang răh đon bơnôh hăm dih băl vă pơchơt, da ƀiơ̆ kơ pơxĕl. Ngê̆ nhơ̆n Y-Djoan Mjâo ăn tơbăt dơ̆ng, jơva đing tartar noh vang vơch mă phơ phŏ adoi hroh hrei, vă pơdrĭu kon pơlei hơmet năm jang mir ƀa, mă duh ‘măn vă pơlung kon xâu tep hlơ̆k ‘lơ̆ng: “Ăh pơgê hrôih, ăh mă ier pơtơm ŏ, pơhlom 3-4 jơ pơgê, mĕ peh pha, ƀă dăh mă ƀok hlôm đing tartar pơlung kon xâu tep. Kơlih xơ̆ ki bơngai Êđê hơnơ̆ng peh ƀa ăh pơgê hrôih”

Kiơ̆ khei năr dăr xơnăm tơhiu lê̆ dôm tơdrong hrat hrĭn lơ̆m erih jang xa hlôi pơm ăn joh ayŏ juăt jue kơ bơngai Êđê tŏk bŏk hiơt hiong. Lơ đe ngê̆ nhơ̆n hơdơ̆r kơ dôm jơva hơri, tơdra brŏng kơ hơdrung hơdrĕch po, ưh xŭk ƀơ̆t đing năm, đing mbuôt, đing tut, chĭng chêng pơre nơ̆r... tŏk bŏk ƀơm hiơt lê̆. Atŭm hăm tơdrong nhan, dăp đon dăp bơnôh đơ̆ng đe ngê̆ nhơ̆n ‘lŏ xơnăm noh anih jang joh ayŏ adoi kăl đei dôm trong jang hơdăh, tơnăp vă tơdrong vei răk tơƀăk mong dôm kơjă joh ayŏ kăp gĭt kon kông pơma atŭm păng dôm tơmam pơdreh tơdra kăp gĭt kơ bơngai Êđê roi năr roi pơlan xă.