VOV4.Bahnar - Radiô Nơ̆r Pơma Việt Nam năr au tôch chơt hơ iă ‘nă ham tơbăt 77 sơnăm Năr pơjing. VOV dôm sơnăm au ki ling lang yak hơdoi hăm tơdrong atŏk tơ iung kơ tĕh đak, hưch hanh hơmanh bơnê jing hơnĭh jang kơtơ̆ng ang lơ trong jang mă blŭng, hơnhăk đei tơdrong yom kiơ̆ trŭh hăm rim ŭnh hnam. Đei mĭnh khul hơmik jang ăn tring hơyŭh rapor păr phô̆t phông, ‘nŏh dôm bơngai jang kmăi kmŏk hyup nơ̆r, pơre nơ̆r ư̆h kơ mĭnh nơ̆r tơtok, yak hlŏh tơnap tap vei kơ jăp trong hơyŭh rapor ling lang păr hơtăih ‘lơ̆ng hơ iă ... Ƀlep năr tơbăt 77 sơnăm năr pơjing Radiô Nơ̆r Pơma Việt Nam, nhôn gô tơroi tơbăt ăn bôl boăl mơ̆ng brŏ tơ jê̆ hơtăih băt găh dôm bơngai jang kmăi kmŏk pơre nơ̆r hăm tơdrong bơ̆ jang hơmik, vei kơ jăp trong hơyŭh rapor păr jơ̆p tơring tơrang:

Rim kơdră tang măt kăt che et hơtŏk Hơnĭh tơm Pơre nơ̆r Tĕh đak Chiêu Lầu Thi, tơ̆ tơ̆ tơring Hồ Thầu, apŭng Hoàng Su Phì, dêh char Hà Giang. (Rup: VTC News)

Đơ̆ng loĕl kông kơjung mă 2 tơ̆ dêh char groi kông Hà Giang - Chiêu Lầu Thi. Kiơ̆ nơ̆r hơdrung Dao ‘nŏh Tơsĭn tăl hơmơ̆l kơ yuơ ‘mĕh vă tŏk trŭh tơ̆ loĕl kăl yak hlŏh 9 kơnao ... Mă lei sơnăm 2020 mĭnh Hơnĭh tơm pơre nơ̆r rapor tĕh đak hlôi đei pơjing tơ̆ loĕl kơ jung hlŏh au. Vei lăng năng tông kmăi kmŏk pơre nơ̆r tơ̆ au lăp 2 ‘nu bơngai jang, đe sư đơ̆ng rim hơnĭh jang rapor VN1, CK2 tơ̆ Hà Nội rim khei tơplĭh dĭh băl năm bơ̆ jang. Tơ̆ hơnĭh kmăi pơre nơ̆r au, hơtăih thoong đak kơna ‘nhŏng ŏh măh chă mong sŏ nhă pơkom đak ‘mi ăn prăt sơnăm. Mă lei, tơ̆ au tĕh ju jĭ tôch kơtang. Bơngai jang Kih thuơ̆t Cao Hoàng Tiến tơroi: “Năr prăng adoi nhen ‘năr ‘mi, tơdăh pĭh hơbĕn ao ‘nŏh kơtĕch mĭnh giĕng tim mă hrĕng ‘mơ̆i, mă lei đak jĭ kơƀăh lơ lŏh kơna jĭ hơnơ̆ng chă tơplĭh hơbĕn ao hrŭk lê̆ trŭh mĭnh khei chĕp brŏk lê̆ kon hơkăn chă pĭh ăn”.

Oei tơ̆ tơring atăih kon pơlei, vă đei ‘nhot, đei phe sa, rim đe ‘nhŏng jei gô năr kơchơ, kiơ̆ kon pơlei jur đơ̆ng kông răt păng pŭ, tung chă pai sa kơtĕch kơ giĕng hloi. Tơ̆ tơring groi kông đei ‘măng ‘mi kơtĕch kơ khei, ư̆h kơ gơ̆h vă jur năm tơ̆ kơchơ kơna chă sa săi mi tôm hơdrĭh đĕch. ‘Măng kial hơbŭt kơsô̆ au ki pơm ăn kơ đe ‘nhŏng măh tăr văr, tơ̆ groi kông kơ jung hlŏh 2.000m pơtêng hăm đak dơsĭ, kial tơhlu ơ ŭ, nhen lĕ vă huơ̆r hŭt đĭ đăng, glăih taih hơnơ̆ng ... oei lơ̆m hnam jang kmăi kmŏk mă lei jơhngơ̆m đơ đôl hơmơ̆t kơ glăih taih pơm ăn hư răm kmăi kmŏk.

Kơdră chĕp pơgơ̆r VOV Đỗ Tiến Sỹ năm tơmang Radiô rapor VN2.

Tơdrong jang kơ đe ‘nhŏng năr ayơ jei lei lăi, iung đơ̆ng 4 jơ pơgê plôih kơmăi pơre kênh VOV1 păng kênh VOV4 rim nơ̆r kon kông tơgŭm ăn kon pơlei rim dêh char Hà Giang, Tuyên Quang, Yên Bái, Cao Bằng chă mơ̆ng... Jơhngơ̆m đon đe sư hơnơ̆ng kơchăng, trong hơyŭh rapor ư̆h kơ gơ̆h tơpăt vă kon pơlei chă mơ̆ng kơtơ̆ng ang đơ̆ng Hà Nội, dôm trong chă jang sa, tơ iung pơjing erĭh sa ăn ŭnh hnam .... Rim bơngai jang kih thuơ̆t păng rim kŏng nhân anai jei đei kon hơ ‘lơ̆p oei ‘lơ̆p ... ‘Măng mă au Radiô rapor lơ ƀai chĭh tơbăt găh năr pơm lêh mơt hŏk sơnăm hŏk ‘nao pơm ăn rim đe ‘nhŏng ... tơ oei pă sơ̆n, dơ̆ng pă sŭk. Tơdăh dang ei oei tơ̆ hnam, ư̆h kơ jor ba kon năm chă răt hla bơar chĭh, kơsơ̆p hla bơar hŏk, hơbĕn ao ăn kon năm hŏk sơnăm hŏk ‘nao ... Găh oei tơ̆ au đe ‘nhŏng lăp băt krao điên thoăi chă hơlêm pơlung kon hơ ‘lơ̆p hơdrin năm hŏk pơhrăm.

Tơ̆ Radiô rapor Nam Trung bộ đei pơjing tơ̆ apŭng Thuận Nam dêh char Ninh Thuận ‘nŏh tă tŏ hlơ hlĕng prăt năr, tŏ hŭl jĭ hơ hir prăt kơ khei. Radiô rapor Nam Trung bộ đei Radiô Nơ̆r Pơma Việt Nam tơmơ̆t jang lơ̆m sơnăm 2021. Tơdrong jang tơm ‘nŏh rapor pơre nơ̆r ăn pơ đĭ lơ̆m tơring Biển Đông păng ƀar achon dơsĭ Hoàng Sa păng Trường Sa kơ Tĕh đak. Lơ̆m mă ƀiên chê̆ ư̆h kơ tok lơ kơna kơdră kơpal hlôi pơgơ̆r ăn asong khŭl jang kih thuơ̆t chă tơplĭh dĭh băl năm bơ̆ jang đơ̆ng rim radiô rapor pơre nơ̆r tơring Tŏk bŏk păng Nam ƀô̆ năm bơ̆ jang. ‘Nhŏng Quảng tơklăh ti hăm kon hơkăn păng ‘nhŏng ŏh Radiô rapor pơre nơ̆r An Hải, Đà Nẵng – hơnĭh mă ‘nhŏng bơ̆ jang hlŏh mơjĭt sơnăm vă năm tơ̆ au bơ̆ jang... ‘Nhŏng Quảng tơbăt:  “Ŭnh hnam nhôn đei ƀar ‘nu kon tŏk bŏk oei hŏk pơhrăm ( mĭnh ‘nu hŏk lăm 11 păng 1 ‘nu hŏk lăm 8) kăl đei ƀă oei tơ̆ hnam, mă lei kơ yuơ tơdrong jang, kơ yuơ trong hơyŭh rapor kơna ba ư̆h kơ ‘nhoen trong hơtăih năm tơ̆ au iŏk tơdrong jang...”.

Năr blŭng năm tơ̆ radiô rapor pơre nơ̆r Nam Trung ƀô̆ ‘nhŏng măh hlêng hlang kơmăt kơ yuơ radiô đei pơjing tơ̆ mĭnh hơnĭh hơtăih apŭng Thuận Nam trŭh hlŏh 30 kây sô̆, rim ‘măng lĕch tơ̆ ‘ngoăih chă dăr lăng kmăi kmŏk, tơlei, jrăng ‘nŏh chuơ̆h tŏ măh sa jơ̆ng. Pha hăm Chiêu Lầu Thi, tơ̆ Thuận Nam 4 pơyan tŏ jrăh, hơbĕn ao pĭh đang chă sơ̆k lăp dôm jĭt pơnĭt jơ ‘nŏh đĭ hrĕng ... mă lei lăp mĭnh ƀar khei đơ̆ng rŏng ‘nŏh hơbĕn ao đĭ dơ̆m kơ yuơ đak koai koer oei đei đak ƀăt ƀŏh đak dơsĭ. ‘Nhŏng Quảng hlôi bơ̆ jang lơ̆m Radiô Nơ̆r Pơma Việt Nam đĭ 20 sơnăm. ‘Nhŏng hlôi năm jang tơ̆ koĕl Bà Nà, Sơn Trà... kơ yuơ lơ lŏh ‘nhŏng ƀô̆h hơdăh trong hơyŭh rapor ‘nŏh gĭt kăl hlŏh. ‘Nhŏng Quảng tơroi lơ̆m bơ̆ jang pơre nơ̆r tơ̆ loĕl kông Bà Nà, Sơn Trà (Đà Nẵng) nhen lĕ chă pơ ư pơang đĕch. “Sơnăm 2021, ‘măng gak pơre nơ̆r tơ̆ hơnĭh kmăi pơre nơ̆r lơ̆m achon Sơn Trà ƀlep ƀơ̆t dôm năr ‘mi kial hơbŭt kơsô̆ 9 pơrăm Đà Nẵng. Prăt măng kial tơhlu ơ ŭ nhen lĕ ‘mĕh vă huơ̆r hŭt pơ đĭ hnam kmăi pơre nơ̆r hloi. Pŭn ai kơtech mơjĭt sơnăm au, yak hlŏh băt dôm ‘măng ‘mi kial hơbŭt hơbông tĭh iĕ mĕ kon, trong hơyŭh radiô rapor tơ̆ An Hải, Sơn Trà oei gei hơnơ̆ng...”.

Dang ei vĭh tơ̆ au, Radiô rapor pơre Nam Trung ƀô̆, dôm tơdrong băt hơdăh ‘nŏh hlôi pơm ăn kơ ‘nhŏng Quảng chă hơlêm bôl boăl, ‘nhŏng oh, ‘nhŏng pơma:  “Nhôn băt hlôh ƀô̆h hơdăh trong hơyŭh rapor kơ radiô rapor pơre nơ̆r Nam Trung bộ đei chă pơre nơ̆r jơ̆p lơ̆m tơring Biển Đông, pơtrŭh kơtơ̆ng ang ăn kon pơlei rôp ka hơdang, kang ƀô̆, ƀô̆ đô̆i tơ̆ Achon dơsĭ Trường Sa kơ yuơ lơ lŏh sa roi lơ̆m ‘mi kial hơbŭt hơbông ‘nŏh trong hơyŭh rapor kơ Radiô sa roi hơdăh hlŏh dơ̆ng vă kon pơlei păng kang ƀô̆ ƀô̆ đô̆i tơ̆ achon dơsĭ , đak dơsĭ băt hơdăh kơtơ̆ng ang găh tŏ ‘mi kial vă tơtom chă kơ ‘nơp tơ̆ hơnĭh bing sơđơ̆ng. Rim ‘măng ‘nhŏng ŏh oei tơ̆ achon dơsĭ, kon pơlei rôp ka hơdang tơroi tơbăt trong hơyŭh radiô kơtơ̆ng tôch kơ nhên ‘nŏh bơ̆n chhôk dêh kơ yuơ tơdrong jang oei mĭnh ƀôt kơ bơ̆n hlôi tơgop tŏ sĕt sot ăn tơdrong atŏk tơ iung mŭk drăm tơpôl kơ tĕh đak păng vei lăng năng tông đak dơsĭ, rơvơ̆ng plĕnh kơ Tĕh đak”.

Kơ ‘năr jei nhen tơ̆ gơmăng, tơ̆ loĕl kông tĭk hơmơ̆l nhen Mẫu Sơn (Lạng Sơn), Phia Oắc (Cao Bằng), Cổng Trời (Hà Giang); Pha Đin (Lai Châu); Núi Quế (Quảng Nam); Bà Đen (Tây Ninh), tơ̆ groi kông Dak Lăk, groi chuơ̆h Ninh Thuận dăh mă tŏk bŏk tơring tơmăn thoong đak Cửu Long ... Dôm bơngai jang kuh thuơ̆t ư̆h kơ ‘nhoen tơngiĕt găng, gơmăng ‘mi tôn, mư̆h tŏ nhen lĕ chhông, mư̆h kial hơbŭt jen lĕ huơ̆r hŭt akau jăn mă lei oei dơ̆ng kơ jăp tơklep hăm kmăi kmŏk vă pơre nơ̆r kĕ păr hơtăih hlŏh dơ̆ng đơ̆ng tơring groi kông trŭh achon dơsĭ, đơ̆ng tơring kơdrơ̆m tĭk tơ̆ tơring chŏh jang sa păng pơtrŭh trong hơyŭh rapor jơ̆p jang groi tĕh lơ̆m plei tĕh.

Bơngai chĭh: Nhà báo Đồng Mạnh Hùng/VOV

Tơblơ̆ nơ̆r: Amazưt