Đơ̆ng pơgê hrôih truh kơmăng, mă đơ̆ng ‘năr tŏ hang dăh mă kial tơ ngiĕt gro, nơ̆r aloa pơih đơ̆ng kông Hàm Rồng oei păr ang ling lang. ‘Nhŏng Ngô Khổng Tuấn Anh, 1 lơ̆m 4 ‘nu bơngai jang ki thuơ̆t trư̆k pơih hơyuh rapor ăn tơbăt: đơ̆ng Anih pơih hơyuh rapor đei pôk rĭ đơ̆ng plt Pleiku tŏk tơ̆ kông Hàm Rồng, hơyuh rapor ăn Radio pơdăh um rup đơ̆ng 40 – 50km đei pơih xă đơ̆ng 80-100 km, pơih tơroi jơ̆p lơ̆m dêh char Gia Lai. Mă lei, tơplih kơ ‘nŏh, 4 ‘nu bơngai bơ̆ jang athei bơ̆ jang tơ̆ anih hơdrô̆ hơdrăn, ưh đei bơngai nai.

Kiơ̆ ‘nhŏng Ngô Khổng Tuấn Anh, mă đơ̆ng jê̆ trong gre 14 gre yak vih vât tôch lơ păng lăp hơtăih kơ plt Pleiku 14 km đĕch ră, mă kông Hàm Rồng nhen thĕng kơ kot ưh đei bơngai yơ, prăt sơnăm pôm ƀôh tŏ, kial, ‘mi mă ưh ‘nŏh hơmơ̆l đĕch. Đơ̆ng jơ̆ng kông tŏk truh tơ̆ anih jang ‘nŏh jĭ krang kuĕch kuĕl, kơjung hlŏh 400m, jur tŏk ưh kơ đei ƀônh kiơ: “Lơ̆m pơyan ‘mi, trong tŏk tơ̆ kông Hàm Rồng tôch rơbơ̆r, mưh hla hơngo 2 păh ruh hơlŭng tơ̆ trong, hao gre tŏk tôch pơmat tat. Ƀât lăp inh hao gre tŏk tơsĕr, pơ̆k, rok trong ‘nŏh hoi đei bơngai vih vât. Inh adrin tơiung gre păng tŏk tơ̆ anih jang trŏ jơ vă pơlơ̆h băl bơ̆ jang hăm ‘nhŏng ŏh. Pơmat tat, mă lei inh oei adrin bơ̆ jang ‘lơ̆ng tơdrong jang”.

‘Nhŏng Trần Thiên Thế jang ki thuơ̆t pơih hơyuh rapor lơ sơnăm tơ̆ Anih Hàm Rồng âu ‘năi. ‘Nhŏng ăn tơbăt, inh hăm bôl boăl bơ̆ jang đĭ juăt hăm tơdrong arih, pơdơ̆h ngôi tơ̆ hnam iĕ tơ̆ âu bơih, hăm tơmam sŏng xa ưh đei tôm ‘nhĕm ‘nhot. Mă lei đon hli kơ glăih tăih lơ̆m pơyan ‘mi păng unh xa lơ̆m pơyan phang đei hơnơ̆ng, yoa Hàm Rồng kơjung nhen thoi jrăng hyup glăih tăih păng đei pơm tŏk bŏk bri ‘long hơngo tôch ƀônh đei unh xa: “Vă rim sơnăm kŭm đei glăih tăih, ƀât lăp dơdar, ƀât lăp hiong răm tôch lơ, pơyan phang ‘nŏh tôch ƀônh đei unh xa, yoa ‘ngiĕt, ‘long bri đei jŭm dăr anih. Đei tơdrong kiơ găh jơhngâm pran ‘nŏh hơnơ̆ng kơchăng tơplih ăn băl bơ̆ jang. Pơyan ‘mi kial tơdrong hư găh ki thuơ̆t đei hơnơ̆ng đĕch, kơplăh ‘nŏh 1 ‘nu bơngai tôch mơmat vă hơmet. Ưh kơsĭ ka trư̆k ră, mă lei mưh đei tơdrong hư ‘nŏh ‘nhŏng oh chu hŭt tơdrong jang tơ̆ hnam vă năm tơ̆ anih jang vang hơmet”.

Ƀok Nguyễn Khắc Quang, Phŏ Kơdră Anih Radio pơdăh um rup dêh char Gia Lai ăn tơbăt: đĭ đăng tơdrong tơroi hăm tivi, radio tơ̆ dêh char tơtă gơnơm đơ̆ng Anih pơih hơyuh Rapor Hàm Rồng ngăl vă gơ̆h truh hăm bơngai mơ̆ng lăng. Vă jê̆ 1 sơnăm ‘nâu, Radio pơdăh um rup Gia Lai đei dơ̆ng tơdrong jang ‘nao ‘nŏh jĭ hyup pơih kênh radio teh đak VOV1 păng VOV4, jơ pơih truh 19 jơ 1 năr. Mă đơ̆ng oei hơtăih kơ tơring kơdrâm, tơdrong bơ̆ jang oei đei lơ tơdrong pơmat păng krê hơmơt ‘năi, mă lei dôm bơngai jang ki thuơ̆t tơ̆ Anih âu hơnơ̆ng adrin yak hlŏh pơmat tat, jang đang ‘lơ̆ng tơdrong jang đei pơjao.

“Radio pơjing tơdrong ‘lơ̆ng, hơmet tôm tơdrong jô̆ hloi găh tơmam drăm păng jơhngâm đon, đei trong tơgŭm, pơlung ‘nhŏng oh đei dơ̆ng kon jên ‘ngoăih kơ jên khei pơma atŭm. Hlŏh 1 sơnăm ‘nâu Radio nơ̆r pơma VN hơnhăk tơmât kơmăy pơih hơyuh rapor kênh VOV4, atŭm hăm ‘nŏh, hyup iŏk hơyuh rapor VOV1 dơ̆ng, tơpă ‘nei hăm anih jang nhôn thoi noh tôch hơiă, hơiă hlŏh dơ̆ng mưh đei kơmăy ‘nao, hơyuh rapor tôch jăng. Tơ̆ Kbang, tơring kăn kư̆ kăch mang sŭng mơ̆ng kŭm tôch rơđăh. Kiơ̆ đơ̆ng noh, kon pơlei gơ̆h mơ̆ng đei lơ tơdrong tơroi tôch hơiă, tôch čhôk ‘nă ăn bơngai mơ̆ng brŏ tơ̆ dêh char Gia Lai pơma atŭm păng jơ̆p tơring jŭm dăr”.

Gơmăng jur, hơ heu kial tơ̆ ngĭt tơ̆ kơpal kông Hàm Rồng, đe kăn ƀô̆ pơih hơyuh rapor kơ Raio pơdăh um rup Gia Lai oei bơ̆ jang hơnơ̆ng. Yak hlŏh rim tơdrong pơmat tat, hơdrô̆ hơdrăn vă tơgop hơnhăk tơdrong tơroi truh hăm bơngai mơ̆ng lăng jơ̆p jang tơring./.