Et xoi pơjing ‘nhŏng oh kơ bơngai Ê Đê đei pơgơ̆r hăm tơdrong bơ̆ng pang kơ 2 păh unh hnam, ‘nhŏng oh kơtum kơtŏng lơ̆m pơlei pơla. ‘Nâu jing minh khôi tơguăt ‘nhŏng oh, kơtum kơtŏng truh hnưr kon xâu hloi. Ƀok pơjâu Y-Wươn Niê Kdăm (60 xơnăm, oei tơ̆ Wiâo A, apŭng Krông Năng, dêh char Dak Lak) ăn tơbăt, tơmam plang xoi kơ yang đei khăn tanh, kong păng iĕr. Mă lei mưh ưh đei tôm tơmam plang noh adoi gơh pơgơ̆r et xoi kơlih bơngai Êđê akhan, đon băt ‘mêm kơ eng noh kăp gĭt hloh. Khôi et xoi đei pơgơ̆r hăm tơdrong kơdih ‘meh vă đơ̆ng 2 păh, ưh đei kơchĕng găh tơdrong pơyua âu to. Păng mă kăl, dôm bơngai pơgơ̆r et pơjing ‘nhŏng oh athei truh đơ̆ng 5 jơ pơgê hrôih vă bơ̆ng pang tơ-‘ngla hnam ƀuh nhŭng, hơmet tôm tơmam plang, tơkang ge tơdrô: “Ăh mă et pơjing ‘nhŏng oh noh krao akŏm unh hnam, kơtum kơtŏng 2 păh, atŭm bơ̆ng pang păng băt hơdăh đơ̆ng dang ei truh ning mônh kơnh, 2 păh unh hnam băt noh ‘nhŏng oh kơtum kơtŏng dih băl. Atŭm mĕ, atŭm ƀă. Đơ̆ng rŏng kơ noh vă bre ‘nhŏng oh băt ‘mêm dih băl nhen klak klơm kơdih, axong dih băl khăn tanh, pơjao dih băl kong âu to”.

Ăh rim bơngai đei anih oei xơđơ̆ng, drăkăn hơnơ̆ng oei găh pơbăh hnam pơtăm, oei drŏnglo noh tơ-oei găh tu, đe ngê̆ nhơ̆n pơdreh chĭng chêng pơre tơdra chêng tơroi et pơjing ‘nhŏng oh pơtơm. Ƀar ‘nu pơjing ‘nhŏng oh tơ-oei ăh jê̆ kơmang tơmam õi tơbeh. Rim bơngai tơ-oei tăp dăr vă bơ̆ng pang ăn tơdrong et pơjing ‘nhŏng oh đei pơjâu, kră pơlei, kơdră pơlei dăh mă dôm bơngai đei kơdrưh. Ƀok pơjâu Y -Wươn Niê Kdăm ăn tơbăt, lơ̆m et pơjing ‘nhŏng oh, khôi pơjao kong ăn bơngai pơjing ‘nhŏng oh noh kăp gĭt hloh kơlih hăp tơbang tơdrong tơguăt dih băl nhen ‘nhŏng oh klak klơm. Pơjâu Y-Wươn tơblang:  “Adrol kơ pơjao kong noh xoi kơ Yang minh pôm iĕr, ge tơdrô vă tơroi hăm yă ƀok dơnơm băt. Pơjao kong vă tơroi ăn kơ Yang băt đơ̆ng dang ei khĕ ning nai kơnh noh ‘nhŏng oh minh hnam, hơnơ̆ng atŭm dih băl vang tơgŭm lơ̆m tơdrong erih. Tơdrong pơjao ăn dih băl kong noh kăp gĭt tơpă, adoi nhen nơ̆r xơkơ̆t kơ bre klo hơkăn, bre ‘nhŏng oh adoi xơkơ̆t hơnơ̆ng băt ‘mêm, vei lăng, tơgŭm dih băl. Păng đơ̆ng dang ei lơ̆m pơlei adoi băt truh tơbre noh ‘nhŏng oh lơ̆m minh hnam”

Đơ̆ng rŏng kơ xoi tơbeh, tơbre pơjing ‘nhŏng oh nhen ‘klak klơm, atŭm băt ‘mêm tơgŭm dih băl mưh đei tơdrong tơnap, pơtho akhan dih băl chă pơm jang, vei vêr dih băl truh chăl kon xâu anô̆ anăp kơnh. Pơjâu Y-Wươn Niê Kdăm ăn tơbăt dơ̆ng: “Dang ei kon pơlei oei pơgơ̆r et xoi pơjing ‘nhŏng oh. Inh kơchĕng et xoi pơjing ‘nhŏng oh noh kăp gĭt tơpă, tơbang đon bơnôh tơguăt lơ̆m tơpôl, kon pơlei atŭm erih xa ‘lơ̆ng lơ̆m pơlei pơla. Hơpơi ‘moih kon xâu ning mônh kơnh atŭm băl pơhrăm pơdreh chĭng chêng, pơhrăm găh trong yua nơ̆r pơđơ̆k, pơhrrăm ƀoi dôm tơdrong ‘lơ̆ng rŏ kơ joh ayŏ kon kông po”

Et xoi pơjing ‘nhŏng oh tơƀôh bơngai Êđê lăng tơgĭt đon bơnôh băt ‘mêm lơ̆m pơlei pơla păng ƀenh kơ đon bơnôh kon bơngai, pơtho kon xâu hơnơ̆ng tơrĕk truh dôm tơdrong ‘lơ̆ng hơ-iă lơ̆m tơdrong erih. Dang ei, khôi et mă âu hơnơ̆ng oei đei pơgơ̆r lơ̆m dôm pơlei pơla. Đơ̆ng rŏng kơ et xoi pơjing ‘nhŏng oh, ưh adrô̆ ƀar unh hnam jing ‘nhŏng oh minh hnam, tơgŭm dih băl rim tơdrong jang, atŭm găn hloh rim tơdrong tơnap tap mă oei tơguăt rim bơngai lơ̆m atŭm kơtum kơtŏng tơguăt tơguăl pơjing pơlei pơla roi năr roi phĭ tơtŏ, dơnŏ ‘lơ̆ng, pơdrŏng jơnap.