Đơ̆ng pơgê hrôih, ăh cham Hnam hơkŭm kơ pơlei Ky ƀenh kơ kon pơlei vih akŏm. Hơdruh tơdăm noh tơgŭm ngê̆ nhơ̆n chô̆ hơmrŭk chĭng chêng. Đe hơdruh noh prăl guăng hrŭk hơbăn ao tanh juăt jue atŭm hơmet ăn tơdrong xoi plang... Hơdruh H’By La Byă chơt hơ-iă tơroi: “’Nâu jing ‘măng mă blŭng inh năm akŏm et xoi apinh đak ‘mi noh tam mă băt tôm ôh, mă lei inh ƀôh xô̆ hơ-iă hăm ai tih đei akŏm et xa âu. Et xoi apinh đak ‘mi đei lơ tơdrong ‘lơ̆ng adrô̆ kơ bơngai Êđê”.

Tơ̆ hơla tơm ‘long kră, kon pơlei bơ̆ 2 hơdrơ̆n Pưk hăm dôm tơmam ‘măn xoi apinh đak ‘mi. Minh Pưk noh xoi kơ yang plenh teh, atŭm hăm dôm tơmam plang ăn kơ yang. Pưk găh nai noh anih ‘măn ƀa, hơƀo. Găh hơla Pưk noh xoi kơ yang kơnê̆ Yang Le, yang mă hlôi ƀơm phak kơlih pơchŭt xem bri brăh năm phă pơrăm mir ƀa. Tơjê̆ hăm noh dôm tơmam plang kơ yang nhen ge tơdrô, iĕr, tơmam bơ̆ hăm kram, phat atŭm hăm dôm mul meo iĕ chrăh um rôih, jơma, um xem...

Ăh jơva chĭng chêng đei pơdreh ang, pơjâu pơtơm ƀai xơkat đei pơdjoi đơ̆ng chăl xơ̆, hăm tơdrong hơpơi ‘meh đei ‘mi kial xơđơ̆ng, pơyan jang đei yua lơ, adoi nhen tơpuh kon xem kiĕk kơnê̆ lĕch đơ̆ng pơlei pơla. Đơ̆ng rŏng kơ xoi plang, pơjâu yak jơ̆ng rei jing um vuông pơtih ăn hơgăt teh mir, đang kơ noh pơtơm khôi jơmŭl rei pơtăm. Ƀok yak adrol, 2 păh ti chĕp 2 tŏ ‘lơ̆ng jơmŭl jĭt ‘nhueng tơ̆ teh, kiơ̆ đơ̆ng rŏng noh đe drăkăn Êđê rei găr ƀa tơ̆ trôm jơmŭl. Ăh kơtoh đak huăng tơ̆ teh, rim bơngai atŭm băl jrơu hơ hơu, xô̆ hơ-iă hăm pơyan jang mir ‘nao...

Năm akŏm et xoi apinh đak ‘mi, yă H’Luếch Hđớk, 65 xơnăm vơch lơ̆m đon:   “Inh ƀrơ̆k kơ đon tơpă, kơlih inh ƀôh pơgơ̆r dơ̆ng khôi et xa juăt xo kơ kon pơlei Êđê noh rim xơnăm pơgơ̆r minh ‘măng adrol kơ jơmŭl rei pơtăm ƀa hơƀo, xơ̆ noh thoi ăi. Dang ei ƀlŏk hơdơ̆r ăh inh oei ‘lâ̆p adoi năm akŏm, dang ei tih vơ̆ ƀôh đei pơgơ̆r et xoi noh inh xô̆ chơt tơpă”.

Kiơ̆ kră pơlei Y Bang Byă, tơ̆ pơlei Ky, phương Thành Nhất, pơlei tơm Buôn Ma Thuột, adrol ki, et xoi apinh đak ‘mi hơnơ̆ng đei bơngai Êđê pơgơ̆r ăh khei năr pơyan phang, đơ̆ng rŏng kơ muih choh mir đang, oei gô ‘mi jur vă rei pơtăm. Ăh tơdrong hơrih tơplih, pơlei pơla jing hê̆ tơring kơdrâ̆m, mir ƀa xơ̆ ki dang ei jing pơgar tiu kaphê, lơ bơngai jăk đơ̆ng pơlei năm hơrih jang xa tơ̆ tơring kơdrâ̆m..., tơdrong pơgơ̆r xoi tơbeh pă gan đei bơih. Mă lei, lơ̆m dôm xơnăm tơjê̆ âu, hăm tơdrong tơgŭm đơ̆ng teh đak, pơlei pơla hlôi hơmet tơdrong et xoi juăt jue, răk vei dôm um ai joh ayŏ ‘lơ̆ng rŏ, pơkăp hăm tơdrong hơrih ‘lơ̆ng rŏ hloh: “Trŏ tơpă vei răk khôi juăt xo kơ kon pơlei jing tơdrong tơnap hăm pơlei Ky, mă lei đei tơdrong tơgŭm đơ̆ng phương Thành Nhất, hlôi tơgŭm jên vă thôn, pơlei pơgơ̆r et xoi apinh đak ‘mi. Et xoi apinh đak ‘mi kăp gĭt noh apinh ăn pơyan ‘mi xơnăm âu hiôk hian jrah jrai hloh, pơm jang pŭn ai đei yua, đei por xŏng phĭ tơtŏ, đei hơbăn ao hrŭl ăn kon pơlei adoi nhen tôm pơlei tơ̆ tơring Tây Nguyên”.