Ăh mă găr ơa vă jê̆ đum, bơngai Jrai “ngă Yang Hri”(xoi kơ Yang hri).Tơ̆ na, anih xoi kơ Yang Hri, đe ‘măn minh tơm xik găh Hlĕch. Kiơ̆ pơjâu xoi tơbeh Y-Phĭ Mjâo  tơ̆ pơlei A1, thĭ trâ̆n Ea Sup, apŭng Ea Sup, dêh char Dak Lak, Tơm xik đei ‘măn găh hlĕch âu vă plang ăn kơ Yang-gah-ngŏ, dang dôm yang hơpang vei vêr tơring jŭm dăr păng hăm yang tơ̆ plenh vei lăng pơlei pơla, mir ƀa. Ƀok pơjâu Y-Phĭ Mjâo ăn tơbăt:  “Noh ăh khei rei pơtăm ƀa hơƀo. Xoi kơ Yang Hri yang ƀa. ‘Nâu jing khôi juăt đơ̆ng kră xơ̆ kơ bơngai Jrai, xoi tơbeh kơ Yang Hri Yang Hrai, kon pơlei Jrai krao noh Trum, đơ̆ng chăl mĕ ƀă yă ƀok xơ̆ bơih. Bơngai Jrai xoi kơ yang hri vă apinh ăn tơdrong jang xa hiôk hian, jang mir na ưh đei ƀơm kơne phă pơrăm”. 

Vă pơgơ̆r Et xoi kơ Yang Hri, kră pơlei gô rơih “khei năr ‘lơ̆ng” đang kơ noh akŏm hŏk hôp kon pơlei, drơ̆ng nơ̆r ‘năr pơgơ̆r et xoi. Kră pơlei axong tơdrong jang ăn rim bơngai lơ̆m pơlei hơmet dôm tơdrong jang phara băl. Bơngai noh hơmet tơdrô ge, bơngai noh hơmet ier dăh mă nhŭng, ‘nhot bri, por prung... Truh ăh ‘năr pơgơ̆r et xa, đơ̆ng rŏng hơmet tôm tơmam plang, pơjâu pơtơm pơre nơ̆r xơkat xoi tơbeh, hơvơn đe yang hơpang vih bơ̆ng pang đon bơnôh plang đơ̆ng kon pơlei pơla. Pơjâu Y-Phĭ Mjâo tơroi: “Ăh xoi kơ Yang Hri bơ̆n athei hơmet tơmam xoi tơbeh. Đe pơjâu pơtơm gơh xoi. Lơ̆m kơtum kơtŏng mă yơ noh athei tơchă bơngai noh vă xoi tơbeh. Xoi tơbeh hăm ier păng minh tơm xik. Mưh ưh đei ier, tơm xik noh ưh gơh xoi tơbeh ôh. Rơmo noh ưh gơh xoi kơlih kiơ̆ khôi kơ bơngai Jrai noh jing kon tơrong khenh. Nhŭng noh gơh plang xoi tơbeh”

Xoi tơbeh đang, đe kră pơlei, pơjâu krao đe tơdăm păng kon pơlei pơdreh chĭng chêng hơgơ̆r. Jâ̆p pơlei pơla atŭm et xa hơ iă, hơri hơxuang, rim bơngai atŭm et tơdrô păng hơri tơtơl. Et xoi kơ Yang Hri jing khôi kăp gĭt, đei unh hnam păng pơlei pơla pơgơ̆r hăm tơdrong hơpơi ‘moih tô̆ ‘mi kial ‘lơ̆ng xơđơ̆ng, pơyan choh jang giơ̆ng ‘lơ̆ng, tơƀôh tơdrong tơguăt tơguăl lơ̆m pơlei pơla, pơjing jơhngơ̆m pran kơ tơpôl. Pơjâu Y-Phĭ Mjâo ăn tơbăt dơ̆ng: “Tơdrong xoi kơ Yang noh tôm bơngai athei kiơ̆. Mưh bơngai ‘lŏ kră hiong noh đe mơlôh duh athei xoi kiơ̆ bơngai kră. Ưh gơh pơm hiong khôi juăt jue kơ hơdrung hơdrĕch po. Xơ̆ ki adoi xoi kơ Yang, Jrai, Êđê, Mnông adoi xoi kơ Yang.”

Et xoi kơ Yang Hri kơ bơngai Jrai tơ̆ apŭng Ea Sup jing minh  um ai joh ayŏ juăt jue kăp gĭt đei kon pơlei tơ̆ âu lăng tơgĭt păng vei răk tơƀăk mong đơ̆ng lơ chăl bơngai erih jang xa. ‘Nâu jing ‘măng vă ‘nhŏng oh lơ̆m unh hnam, pơlei pơla akŏm atŭm dih băl lơ̆m tơdrong hơtŏk mŭk drăm, pơjing unh hnam jơnap păng kơhret tơdrong tơguăt tơguăl pơlei pơla.