VOV4.Bahnar – Dêh char  Lâm Đồng tŏk bŏk oei hơmet pơgơ̆r ăn Festival pơkao Đà Lạt 'măng mă 9 xơnăm 2022. 'Nâu jing tơdrong kăp gĭt tih tên hloh đơ̆ng xơ̆ truh dang ei pơdui đunh lơ̆m 2 khei, pơgơ̆r đơ̆ng năr 1/11 truh năr 31/12.

Hăm hơnăn “Đà Lạt – Pơlei tơm 4 pơyan pơkao”. 'Nguaih kơ 10 tơdrong tơm pơgơ̆r tơ̆ pơlei tơm Đà Lạt,  Festival pơkao Đà Lạt 'măng mă 9 oei đei 41 tơdrong jang pơgơ̆r lang xă tơ̆ 2 pơlei tơm Đà Lạt, Bảo Lộc păng jâ̆p dôm apŭng kơ dêh char. Kiơ̆ kơ ƀok Ngô Văn Ninh, Kơdră Anih jang, bơngai juăt rapor ăn Anih vei lăng kon pơlei dêh char Lâm Đồng, Festival pơkao Đà Lạt jing 'măng vă hơtŏk pran păng hơtŏk kơjă hơnăn “Đà Lạt – pơlei tơm Festival pơkao”, tơbang um rŭp tơmang pơhiơ̆ Đà Lạt - Lâm Đồng, hơnăn “Đà Lạt – akŏm tơdrong rơgei đơ̆ng hơgăt teh grasia”, tơguăt hăm tơdrong tơmang pơhiơ̆ choh jang xa păng lơ tơdrong jang kăp gĭt kơ tơring. Dang ei tơdrong hơmet tŏk bŏk đei dôm anih jang lơ̆m dêh char tơlĕch jang hăt hot.

VOV Tây Nguyên/Lan tơblơ̆