VOV4.Bahnar - Dôm năr vă truh Tết Nguyên đán, ‘nhŏng Siu Phi Lip (rơ nĕh sơ 1992, tơ̆ plei Yon Tok, xăh Ia Glai, apŭng Chư Sê, dêh char Gia Lai) kŭm hăm unh hnam chă hơ met lê̆ lơ tơ mam xa năr Tết. Tơ drô ghe, ‘nhĕm rơ mo kro, nhŭng, iĕr, phe tơ yông đei tôm. Mă lei kiơ̆ ‘nhŏng, Tết ưh gơ̆h thĭu 1 tơ mam xa kơ bơ ngai jrai. ‘Nŏh jĭ hơ mrĕ tŭl hăm kơ tu iŭ. ‘Nhŏng hăm mŏ sư năm tơ̆ xăh Ia Mơr, apŭng Chư Prông, hơ tăih hơ hnam dang 20 km vă năm chă.

‘Nhŏng Siu Phi Lip pơ ma: “Kơ tu iŭ đa rôp lơ̆m pơ yan phang, tŭl hăm hơ mrĕ tôch ‘lơ̆ng, yoa pơ yan phang đei hloi kơ tăp kơ tu iŭ. Pơ yan phang inh năm đơ̆ng hnam truh tơ̆ xăh Ia Mơr, apŭng Chư Prông, pơ yan ‘nâu kơ tu ‘yăl hlŏh, chĕp ba tơ pu nilon, xăng, kơ thŭng. Ƀôh tơ pu kơ tu ‘nŏh mât kăt iŏk. Ƀât lăp năm ƀât 3 jơ pơ gê truh 8 jơ ‘nŏh đei ƀĕnh bơih, ƀât lăp đei truh 2, 3 kĭ hloi, tơ dăh pŭn. Mưh vih tơ̆ hnam, ba tong sư lơ̆m đak vă rơ gŏh, sơ̆k đơ̆ng 1 - 2 năr. Đơ̆ng rŏng kơ ‘nŏh tŭl hăm ƀŏh, hơ mrĕ, vă xa ƀât têt mă ưh nŏh ‘măn 2, 3 khei kŭm bưh. Ƀât têt, nhôn đa xa ‘nhĕm rơ mo, ‘nhĕm nhŭng, kơ ne hăm hơ mrĕ tŭl âu, tôch ‘lơ̆ng”.

Dơ̆ng: Tơ blơ̆