Vang truh akŏm năr âu đei dôm khŭl joh hơ ri hơ soang, khŭl ngê̆ nhân kơ dôm hơ drĕch hơ drŭng Tây Nguyên păng Tây Bắc tŏk bŏk arih sa lơ̆m dêh char. Năr akŏm pơ gơ̆r hăm lơ tơ drong joh ayŏ nhen: tôn chĭng chêng, hơ soang, pơm tơ ƀôh dơ̆ng tơ drong joh ayŏ chĭng chêng Tây Nguyên; hơ soang sạp, hơ soang xoè kơ bơngai Mường, lêh hơ soang tơ băt ăn bơ ngai tơ̆l druh dăm kơ bơ ngai Tày, Nùng; hơ soang khèn păng hlôm ‘lal kơ bơ ngai H'mông.

Tơ̆ năr joh ayŏ đei hơ nih pơ dă tơ mam kon kông, kơ deng tơ mam tơ ƀôh dơ̆ng chăl mơ mat sơ̆... Năr joh ayŏ sơ năm 2022 ‘noh jĭ tơ drong jang yak truh vei răk păng hơ tŏk tơ drong joh ayŏ đơ̆ng tơ pôl dôm hơ drĕch hơ drŭng tŏk bŏk arih sa lơ̆m dêh char Gia Lai, kiơ̆ đơ̆ng noh roi tơ ƀôh um rup păng kon bơ ngai Gia Lai, tơ gop pơ trut hơ tŏk tơ iung tơ mang lăng tơ ring.