Tơ̆ âu đei 25 kơdeng tơmam, roi tơbăt ăn tơmoi dôm tơdrong juăt pai xa, ‘nhĕm bot, ‘nhot ‘lơ̆ng đơ̆ng rim tơring, kŭm hăm dôm tơdrong jŏh hơri hơxoang, unh đeng pơchrang ang hơdăh. 

Dôm tơmam xa ‘lơ̆ng đơ̆ng tơring Tây Nguyên nhen iĕr ƀuh, pơlăh đing, pro har, hla ƀlang… kŭm hăm dôm tơmam xa ngôi rok trong nhen ƀĕng ƀeo, ƀĕng lŏk ‘nŭng hăm hla prit nhen thoi Huế, hơbou ƀuh pai nhen thoi Thái… pơm ăn tơmoi truh lăng, răt xa tôch kơlăp đon. 

Hơdai hăm dôm tơmam xa vă tơmoi truh răt xa, Giĕng tơmam xa ‘lơ̆ng oei đei hloi dôm tơmam yoa gĭt kăl nai kơ kon pơlei Gia Lai nhen chĕh phe ƀôt, tiu, mắc ca, điêu hơdrĕng, ‘nhĕm rơmo sơ̆k phang, yến sào, đei lơ bơngai tôch tơrĕk.