Tai khuan facebook “H'Tuyết thổ cẩm Jrai" đei kơ rơbâu bơngai hơlen lăng, jing minh trong tơbang, tơgŭm ăn pơmai H'Tuyết tơ̆ kueng 10, thĭ trâ̆n Phú Thiện, apŭng Phú thiện tĕch đơ̆ng 70 truh 100 tơmam drăm, đei yua truh dôm jĭt trĭu hlj minh khei. Pơmai Tuyết ăn tơbăt, kơtă ah anih tĕch ƀenh ƀang tơmam drăm noh kơmăi sĭt hơbăn ao păng hơbăn ao tanh, pơmai hơnơ̆ng livestream tơbang gah tơdrong hơrih, phơ phŏ jang rah hơri rah vă hơvơn bơngai lăng.

Che tanh Jrai đei pơmai sĭt pơjing ao tai, hơbăn ao hrŭk xa pơkong, ao ghi lê drănglo, hơbăn ao ăn đe hơ-ioh... kiơ̆ trŏ nhen pơkăl đơ̆ng tơmoi răt yua. Gơnơm thoi noh, pơmai hlôi asong đei tơdrong jang ăn 4 ‘nu jang sĭt hơbăn ao, hăm jên khei 6 trĭu hlj 1 khei păng răt tơmam tanh đơ̆ng đe ngê̆ nhơ̆n tơ̆ xah Ia Sol, apŭng Phú Thiện lơ̆m lơ sơnăm kơ âu. Pơmai H’ Tuyết tơroi: “Inh phĭn um, kuay phim pơdah kơtă lơ̆m facebook, Zalo đơ̆ng noh lơ tơmoi đe băt truh păng tơchă truh inh. Đei bơngai pơtruh tin nhăn, đei bơngai răt hơbăn ao. Kơdih inh adoi akŏm kơtơ̆ng ang đơ̆ng facebook, Zalo vă pơhrăm đơ̆ng pơmai oh tơ̆ tơring nai nhen Đăk Lăk, Lâm Đồng, Kon Tum... Inh hmach bơnê kơ dôm bơngai hlôi pơjing mạng tơpôl. Gơnơmd dei mạng tơpôl tơgŭm ăn kơ inh pơhrăm vă hơtŏk tơdrong jang. Adoi gơnơm đơ̆ng mạng tơpôl mă lơ bơngai băt pơtruh tin nhăn păng răt tơmam drăm, ưh hơdrô̆ bơngai răt lơ̆m teh đak mă oei đơ̆ng teh đak đe hloi”.

Tơdrong ‘lơ̆ng kơ tơmam tanh Gia Lai hlôi đei bơngai hơgei sĭt hơbăn ao Minh Hạnh – Kơdră pơjing hơgei Kŏng ti Việt Mốt, bơngai hơ-‘nhăk ao tai, che lŭa, che tanh kơ dôm tơring lơ̆m teh đak gơh lĕch truh teh đak nai, tơrĕk chă tơbang. Ah hơtuch khei 10/2023 âu ki, lơ̆m tơdrong pơdah joh ayŏ “Gia Lai ơi”, kơyuơ Anih jang vei lăng kon pơlei dêh char Gia Lai pơgơ̆r, ‘măng mă blŭng che tanh kơ bơngai Jrai, Bahnar hlôi đei bơngai hơgei sĭt hơbăn ao Minh Hạnh pơjing dôm hơbăn ao ‘lơ̆ng kăp gĭt noh hơbăn, ao tai. Đei hơnăn 4 pơyan: puih phang, pơyan tŏ, pơyan ‘mi, pơyan puih tơngiĕt. Tơ̆ noh, ưh hơdrô̆ um dok brai tanh, mă um rŭp kăp gĭt Tây Nguyên nhen rông, ‘long kră đunh sơnăm tơhro um tơ̆ đak păng thŏng bŏk đơ̆ng ‘long... đei hrơ hrau ‘lơ̆ng hơnơ̆ng lơ̆m che lŭa, pơjing đei dôm hơbăn ao kăp gĭt hloh.

Bơngai hơgei sĭt hơbăn ao Minh Hạnh ăn tơbăt, tơchĕng vă tơgŭm ăn che tanh kon kông tơ̆ Gia Lai gơh đei tĕch tơlĕch lơ̆m tơring, vă tơ-iung dơ̆ng dôm pơlei jang juăt jue lơ̆m dêh char: “Đe huach jơhngơ̆m tanh, đe sư dok um đei tơdrong kăp gĭt kơ tơdrong hơrih, ‘lơ̆ng hơ-iă. Tơdrong mă blŭng noh nhôn hơpơi ‘meh hơ-‘nhăk kơjă tơmam tanh đei hơtŏk. Tơdrong mă âu hăm nhôn noh ƀônh đĕch, kơlih pơtăl kơ kon pơlei tanh hăm brai noh nhôn hơdrin tơroh pơdjoi vă tanh hăn dôm hlak che lŭa. Noh jing trong pơm ăn kơjă kơ che tanh gơh kăp hloh”.

Dang ei, dêh char Gia Lai tŏk bŏk oei tơlĕch lơ tơdrong jang vă hơmet vei răk tơƀăk mong păng pơ-ư kơjă joh ayŏ juăt jue, tơgop pơm ‘lơ̆ng ăn joh ayŏ kon kông Tây Nguyên.

Lơ̆m noh, vei kơjăp sơđơ̆ng đei sơkơ̆t tơguăt hăm tơdrong iŏk yua kơjă joh ayŏ, tĕch răt, tơgŭm bơngai tanh brai gơh hơtŏk mŭk drăm. Yă Nguyễn Thị Thanh Lịch – Phŏ Kơdră Anih jang vei lăng kon pơlei dêh char Gia Lai ăn tơbăt: “Nhôn hơpơi ‘meh pôk bơnê kơ đe ngê̆ nhơ̆n, pơtho pơhrăm ăn đe mơlôh vă vei răk tơƀăk mong tơdrong jang juăt jue, tơguăt hăm pơjing hơgei. Mă 2 noh nhôn hơpơi ‘meh  tơbang, vă dôm bơngai jang hơlen akŏm gah joh ayŏ, dôm bơngai pơjing hơgei hơbăn ao hrŭl ‘lơ̆ng vă pơjing che tanh jing tơmam drăm kăp gĭt gah mŭk drăm, hơtŏk mŭk drăm ăn kon pơlei kon kông tơ̆ dêh char Gia Lai".