Lêh pơtơm gô đei pơgơ̆r ah cham rông kơ pơlei Ia Gri, xah Chư Đang Ya, apŭng Chư Păh, dêh char Gia Lai. Tơdrong hơdah hloh kơ ‘măng akŏm ‘noh tơdrong pơdah tôn chĭng chêng Tây Nguyên hăm tơdrong akŏm đơ̆ng jê̆ 400 ngê̆ nhơ̆n, bơngai joh hơri păng hŏk tro, vă pôk pơ-ư gah tơdrong guăng ‘lơ̆ng kơ pơkao dur dreng atŭm hăm joh ayŏ chĭng chêng kăp gĭt kơ tơring Tây Nguyên.

Atŭm hăm noh, tơdrong akŏm oei tơguăt hăm pơdah joh hơri juăt jue kră sơ̆ păng tơdrong hơri hle hrei âu. Lơ̆m giĕng akŏm, đei pơgơ̆r lơ tơdrong nhen kơdâu marathon, pơdah hrŭk hơbăn ao tanh kră sơ̆, tơpăr khinh khĭ kâu, tơ-iung dơ̆ng khôi et sŏng ƀa ‘nao (et jur xa), pơdah dôm tơmam tanh păng tơmam xa kăp gĭt kơ bơngai Jarai, Bahnar tơ̆ tơring.