Prit jĭ tơmam pơtăm rim bơngai băt ngăl păng kiơ̆ tơdrong juăt yoa đơ̆ng rim tơring, kơdret prit đei pai, pơm jing lơ tơmam xa tôch ‘lơ̆ng. Goih iĕr hăm kơdret prit bri đĭ đei đơ̆ng sơ̆ lơ̆m tơdrong arih xa kơ bơngai Rađe. ‘Nâu jĭ tơmam xa đei đơ̆ng tơdrong juăt arih xa hơdai hăm bri kông. Kiơ̆ tơdrong pơtho đơ̆ng yă ƀok sơ̆, đơ̆ng dơng prit, kơdret prit, ƀum prit, plei dăh mă yŏl prit, bơngai Rađe gơ̆h pơm, pai jing lơ tơmam xa tôch ‘lơ̆ng. Bơngai Rađe đei lơ tơmam xa pơm đơ̆ng yŏl prit nhen pơm goih dăh mă pai hăm pro har. Tơmam xa âu pai, pơm ưh đei pơmat kiơ. Oei goih kơdret prit bri hăm ‘nhĕm iĕr, đe pơm hơlen ƀiơ̆, athei bơngai pơm băt trong pai pơm, tăh xa lăp ‘lơ̆ng, kăl hlŏh jĭ athei pơm thoi yơ vă kơdret prit oei đei kơmâu ‘lơ̆ng păng ƀou phu. Vă gơ̆h đei goih prit ‘lơ̆ng, bơngai Rađe đa kŏh phrit bri jê̆ thong đak, tơm prit mưh kŏh đang athei lŏng pơđĭ hmoc kơđŏh vă pơm kơdret đĕch.

Mŏ H’Lyna Niê, tơ̆ plei Sah B, xăh Ea Tul, apŭng Čư̆ Mgar, dêh char Dak lak tơroi, đơ̆ng kră sơ̆ bơngai Rađe akhan, tơm prit đei đak lơ păng kơchơ̆t ‘lơ̆ng ăn hơkâu jăn, đei lơ tơmam xa đei pai, pơm đơ̆ng kơdret prit nhen pai hơte, pai hăm pro har, xa hơdrih… Oei goih iĕr hăm kơdret prit bri đei năng jĭ 1 tơmam xa ‘lơ̆ng tơ̆ pơlei pơla. “Goih kơdret prit athei đei tôm ya vĭ ‘mơ̆i na gơ̆h ‘lơ̆ng. ‘Nhĕm iĕr ƀuh sĭn, oei pơnăr iĕr ‘nŏh plĕh iŏk sĕch păng chơchŏh mă hĕch. Đơ̆ng rŏng kơ ‘nŏh pĕt pơđĭ đak lơ̆m kơdret prit. Đơ̆ng rŏng dơ̆ng ‘nŏh tŭl hơmrĕ, tăh thim bơ̆n ƀoh, ƀôt ngok, ƀum hĕnh, hla hat. Goih ‘nâu xa tôch ‘lơ̆ng.”

Goih âu đe đa xa hăm por tŏ, mă ưh ‘nŏh xa ngôi hŏh đĕch. Đak ƀăt đơ̆ng kơdret prit hrơm hăm hơ̆ đơ̆ng hơmrĕ ngĕng. Goih iĕr hăm kơdret prit đơ̆ng bơngai Rađe pha ƀiơ̆ kơ ‘nhot kơdret prit pai hăm ‘nhĕm iĕr tơ̆ 1,2 tơring yoa sư đei dơ̆ng tơdrong ƀou phu đơ̆ng hla hat, đơ̆ng ƀum hĕnh păng pơngơi đơ̆ng ƀum ngô hơdrĕng pơm ăn bơngai xa tôch lăp đon. Mă đơ̆ng tơdrong arih xa đei lơ tơdrong tơplih, đei lơ tơmam xa ‘nao mă lei lơ̆m tơmam xa kơ bơngai Rađe, goih iĕr hăm kơdret prit bri oei đei hơnơ̆ng, jing tơmam xa đei lơ unh hnam bơngai Rađe ‘mĕh xa hlŏh.

Mŏ H’Lyna Niê, tơ̆ plei Sah B, xăh Ea Tul, apŭng Čư̆ Mgar, dêh char Dak lak tơroi dơ̆ng, hrei ‘nâu lơ unh hnam pơtăm prit bri lơ̆m pơgar hnam vă iŏk kơdret pai tơmam xa ăn unh hnam. ‘Nâu jĭ tơmam xa đei hơnơ̆ng lơ̆m dôm năr et ot kơ unh hnam păng pơlei pơla, yoa prit đei kơtă lơ̆m pơgar, pơm, pai ƀônh păng xa tôch ‘lơ̆ng: “Tơmam xa ‘nâu ưh đei thĭu lơ̆m pơlei pơla. Hnam yơ đei tơdrong mă chơ̆t dăh mă sơ ‘ngon, dăh mă đei tơmoi, ‘nhŏng ŏh truh ngôi, bơngai Rađe đa ƀuh iĕr vă sŏng xa hơdai, tơƀôh jơhngâm đon hơiă, ‘mêm kơ tơmoi, ‘nhŏng ŏh truh ngôi. Kơplăh ‘nŏh, jơ̆ng iĕr dăh mă pơnăr iĕr đei iŏk pai, pơm lơ tơmam xa pha ra băl, ưh kơ đei hŭt yă kiơ. Mưh pai, pơm goih đe iŏk đĭ kơting vă bơngai kră dăh mă hơ iŏh gơ̆h xa ngăl”.

Goih iĕr hăm kơdret prit bri kơ bơngai Rađe pơm ƀônh, xa ‘lơ̆ng kơna rim bơngai mưh truh ngôi tơ̆ pơlei đei xa tơmam ‘nâu ‘nŏh ling lang kơ ƀlŏk truh hloi.