Ƀok Đinh Quốc Tuấn, Kơdră Anih vei lăng hơdrĕch kon kông dêh char Kon Tum tơroi, kŭm hăm atŏk tơiung mŭk drăm – tơpôl tơ̆ tơring kon kông, tơdrong chĕp vei păng tưk tơiung dôm tơdrong juăt ‘lơ̆ng đơ̆ng sơ̆ tơ̆ dêh char, lơ̆m noh đei tơdrong tôn chĭng chêng hơnơ̆ng đei dêh char tơrek truh, năng kăl, tơlĕch jang hăm lơ trong tôch đei yoa. Truh dang ei, đĭ đei 2.500 sơmrŭk chĭng chêng đei dôm hơdrĕch bơngai kon kông tơ̆ dêh char chĕp vei, păng tưk tơiung kơjă kăp gĭt đơ̆ng sư; kăl loi ‘nŏh jĭ tơdrong đei iŏk tôn chĭng chêng lơ̆m dôm tơdrong joh ayŏ kơ dŏ xoang – chĭnh trĭ tơ̆ dêh char. ‘Nâu jĭ jơnăr vă dôm ngê̆ nhơ̆n pơgơ̆r tôn, tơƀôh dơ̆ng tơdrong juăt tôn chĭng đơ̆ng kră sơ̆, tơgŭm ăn chăl hle hrei ‘nâu băt truh kơjă kăp gĭt đơ̆ng chĭng chêng, đơ̆ng tơdrong hơxoang păng đei đon chĕp vei dôm kơjă kăp gĭt ‘nŏh.

Vang truh hăm “Gơmăng tôn chĭng, hơxoang kơ dôm hơdrĕch kon kông dêh char Kon Tum” đei 170 ‘nu ngê̆ nhơ̆n đơ̆ng 8 khul. Lơ̆m noh đei 7 khul, dơ̆ng tang ăn 7 hơdrĕch kon kông kơtă tơ̆ dêh char, đei: Xơ Đăng, Bahnar, Jeh -Triêng, Jarai, Brâu, Rơ Măm păng Hrê. Lơ̆m gơmăng tôn chĭng, đe ngê̆ nhơ̆n ‘măn jơ tơƀâp, pơma nuh găh dôm tơdrong juăt ‘lơ̆ng đơ̆ng hơdrĕch kơdih, hăm 245 ‘nu bơngai tang măt tơpă vang truh Hop akŏm bơngai tang măt ăn dôm hơdrĕch kon kông dêh char Kon Tum ‘măng mă IV.

Ngê̆ nhơ̆n Ri Ang, bơngai Xơ Đăng, tơ̆ plei Kon Vơng Kia, thĭ trơ̆n Măng Đen, apŭng Kon Plông, ăn tơbăt: “Khul tôn chĭng nhôn đei 17 ‘nu jur tơ̆ âu vang tôn lơ̆m Gơmăng tôn chĭng hơiă kơ Hop akŏm bơngai tang măt dôm hơdrĕch kon kông. Ƀai nhôn vă tôn ăn rim bơngai mơ̆ng ‘nŏh jĭ ƀai tôn chĭng, hơxoang Hơiă kơ pơlei pơla tơplih ‘nao. Inh tôch hơiă đei truh hăm tơdrong tôn chĭng, ngôi pơchơt, tơƀâp dôm hơdrĕch kon kông nai lơ̆m dêh char Kon Tum. Inh tôch hưch hanh”.

Dôm ƀai tôn chĭng, hơxoang lơ̆m gơmăng pơchơt, nhen: Tôn chĭng, hơxoang “Hơiă kơ năr pơchơt” đơ̆ng đe ngê̆ nhơ̆n bơngai Bahnar, apŭng Đăk Hà; Tơdrong tôn chĭng “Ƀlŏk bơnê kơ Đảng, Ƀok Hô”, bơngai Jeh -Triêng, apŭng Đăk Glei; Reh Đing Bu “Vei rĕch”, kơ bơngai Brâu, apŭng Ngọc Hồi; “Hơiă năr et xa tơ̆ pơlei”, kơ bơngai Bahnar, plt Kon Tum... pơm hơiă hlŏh dơ̆ng “Gơmăng tôn chĭng Jơva tơm a-Tơguăt đĭ đăng hơdrĕch kon kông Kon Tum”.

Nghệ sỹ ưu tú Phạm Văn Hân, Kơdră Anih jŏh ayŏ kơ dŏ xoang dêh char Kon Tum, ăn tơbăt, ‘nâu jĭ dôm ƀai tôn reh tôch hơiă, jĭ tơmam kăp gĭt mă đe ngê̆ nhơ̆n đơ̆ng 7 hơdrĕch kon kông kơtă lơ̆m dêh char oei chĕp vei đei: “Dôm ƀai tôn reh âu jĭ dôm ƀai tôn reh tôch hơiă, tơƀôh ăn tơdrong jŏh ayŏ kơ dŏ xoang ‘lơ̆ng hơiă kơ rim hơdrĕch kon kông. Nhen ƀai hơri pơlung, đang kơ ‘nŏh ƀai tôn chĭng, hơxoang, sơng tơmoi dăh mă dôm tơdrong tôn reh lơ̆m năr et soi kơ dôm hơdrĕch kon kông dơ̆ng. Gơmăng tôn chĭng tơƀôh hơdăh tơdrong mât 1 ƀơ̆r đon, tơguăt đĭ đăng hơdrĕch hơdrung tơ̆ dêh char Kon Tum”.

Ngê̆ nhơ̆n rơgei A Thút tơ̆ xăh Mường Hoong, apŭng Sa Thầy tơƀôh đon hơiă mưh đei lăng ƀôh dôm ƀai tôn chĭng tôch hơiă lơ̆m gơmăng pơchơt. Ƀok ƀôh hơiă hlŏh hăm dôm khul ngê̆ nhơ̆n, đei lơ druh dăm, hơioh iĕ, vang tôn reh, hơxoang lơ ƀai tôch hơiă. Tơdrong ‘nŏh tơƀôh hơdăh tơdrong đei hŏk rok băl đơ̆ng jơhnơr mơlôh hăm dôm tơdrong tôn chĭng, reh đing bu, hơri hơxoang kơ dôm hơdrĕch kon kông tơ̆ dêh char; vang tơgop chĕp vei, tưk tơiung kơjă kăp gĭt đơ̆ng tơdrong juăt, jŏh ayŏ kơ dŏ xoang kơ dôm hơdrĕch kon kông tơ̆ Kon Tum.

Gơmăng tôn chĭng oei jing jơnăr vă rim jơhnơr ngê̆ nhơ̆n chă tơƀâp, pơma nuh, hơmet kơjăp tơdrong pơvei lơ̆m tơpôl, atŭm hăm ‘nŏh vang tơgop pơm hơtŏk jơhngâm đon hưch hơmanh kơ hơdrĕch hơdrung păng đon chĕp vei, tưk tơiung kơjă kăp gĭt đơ̆ng jŏh ayŏ kơ dŏ xoang ‘lơ̆ng rŏ đơ̆ng chăl sơ̆.