Pơgơ̆r lơ̆m 4 năr, đơ̆ng dang ei truh ‘năr 31/3 tơ̆ Hơnih tơmang lăng Văn Thánh, tơdrong jang ‘noh jĭ hơnih pơkă joh ayŏ tơmam sa ưh kơ gơh hŭt ‘măn ăn tơmoi tơmang lăng lơ̆m păng ‘ngoăih teh đak kŭm hăm kon pơlei đơ̆ng teh đak bơ̆n oei tơ̆ jơ̆p teh đak lơ̆m apŭng plĕnh teh. Sơnăm ‘nâu, lêh roi tơƀôh păng pơvih pơvăn ăn tơpôl hloh 400 tơmam sa, tơmam huch nhă ‘lơ̆ng kơ 3 tơring găh Tu, Tŏk bŏk, Pơbăh.

Tơ̆ âu, dôm tơmam sa đơ̆ng hmă nhen bip phang đak gao, gỏi hơdang pơkao điên điển, sŭp chả Hà Nội, chả ka Lã Vọng, sŭp bề bề Hạ Long, ‘nhĕm pai klĭ Móng Cái, iĕr ƀuh mắc khén, găr dổi Cao Bằng,… truh tơmam sa ‘lơ̆ng kơ tơring Tŏk bŏk đei dôm bơngai joăt pai gŏ, pơvih pơvăn ăn tơmoi sa. Tơ̆ âu tơmoi oei đei hơdai hăm tơdrong chơt hơiă akŏm, hăm dôm tơdrong pơchơt kră sơ̆ nhen: chô̆ măt teh krĕk, pơlong pai por kơdâu, rok gơng ‘long, chăih ƀŏng lŏng.