VOV4.Bahnar - Dang ei, đei lơ buăl mơ lôh kŭm hăm kon pơ lei tơ̆ dôm pơ lei pơ la Tây Nguyên hlôi đei lơ trong jang vă vei răk, tơ ƀăk mong tơ drong oei sa ‘lơ̆ng hơ iă joăt joe kon kông, vă sơng tơ moi tơ mang lăng đơ̆ng rŏng jĭ covid-19 vă tơ iung ming mŭk drăm, sơ đơ̆ng tơ drong arih sa.

Mă đơ̆ng sơ năm oei mơ lôh, mă lei Siu Thanh, 25 sơ năm, thôn Pleiky, thị trấn Nhơn Hòa, apŭng Chư Pưh tôn chĭng chêng tôch kơ hơ gei. Siu Thanh tơ băt, sư gơh tôn chĭng chêng iŏk đơ̆ng oei ‘lơ̆p, gơh lơ ƀai chĭng chêng kră sơ̆. Mă lei, tơ drong tôn chĭng chêng lơ̆m dêh char Gia Lai pơ ma hơ drô̆ păng dôm dêh char Tây Nguyên pơ ma  atŭm tŏk bŏk hiơt hiong. Kơ lih thoi noh, tơ̆ hơ năp kơnh, Siu Thanh ‘meh vă đei tơ drong bơ ngơ̆t truh hloh dơ̆ng đơ̆ng rim kơ dră anih jang, vă tơ roi tơ băt, tơ ƀôh tơ drong ‘lơ̆ng hơ iă tôn chĭng chêng lơ̆m dôm kơ măy kơ mŏk kơ tơ̆ng ang; pơm dơ̆ng dôm lêh joăt joe ‘lơ̆ng hơ iă tơ klep hăm tơ drong tôn chĭng chêng.

Siu Thanh  tơ roi nơ̆r tơ gop: “Đơ̆ng sơ̆ truh dang ei ĭnh ling lang hơ drin tôch ai vă vei răk păng roi tơ ƀôh tơ drong oei sa ‘lơ̆ng hơ iă joăt joe yua đơ̆ng yă ƀok pơ sư̆ ăn đơ̆ng sơ̆, đei 1 tơ drong tôch sơ ‘ngon ‘noh jĭ hrei ‘nâu mih ma duch nă bơ̆n ‘noh tŏk bŏk roi hiot hiong sư. Mă lei dang ei ĭnh tŏk bŏk hơ dai hăm ‘nhŏng oh lơ̆m pơ lei hơ drin roi tơ ƀôh dôm tơ drong ‘lơ̆ng hơ iă lơ̆m oei sa kơ hơ drĕch kon kông ăn kơ đĭ đăng bôl buăl jê̆ hơ tăih. Păng dang ei athei hơ drin hloh dơ̆ng lơ̆m tơ drong pơ tho dơ̆ng ăn jơ hnơr đơ̆ng rŏng, vă kon mon hơ nơ̆ng vei răk păng tơ ƀăk mong tơ drong oei sa ‘lơ̆ng hơ iă joăt joe kơ kon pơ lei nhôn”.

Jĭ kăn ƀô̆ tơ̆ Anih jŏh ayŏ kơ dŏ xoang, tơ roi tơ băt apŭng Kbang, dêh char Gia Lai, Đinh Mỡi đei pơ jao vei lăng 1,2 anih gru groa so kơ apŭng. Tơ drong jang tơm ‘nŏh roi tơ ƀôh ăn tơ moi găh tơ drong jang kăch mang đơ̆ng kon pơ lei tơ̆ tơ ring lơ̆m 2 ‘măng iung tơ blăh Phalăng păng Mi păng dôm tơ drong juăt ‘lơ̆ng đơ̆ng hơ drĕch bơ ngai Bahnar. Mă đơ̆ng blŭng sơ năm 2021 vih tơ̆ âu, tơ drong chă tơ mang lăng tơ̆ âu ƀơm ưh ‘lơ̆ng yoa đơ̆ng jĭ COVID-19, mă lei ‘nhŏng oei pơ lung kon pơ lei adrin pơ tâp pơ hrăm, vei kơ jăp khul tôn chĭng, khul tanh brai vai khăn. Hrei ‘nâu, anih chă tơ mang lăng đei ƀôh vă jang tŏk dơ̆ng, ‘nhŏng kŭm hăm kon pơ lei chơt hơ iă tơ lĕch trong roi tơ ƀôh dôm tơ drong juăt ‘lơ̆ng đơ̆ng sơ̆ kơ tơ ring tĕh Kbang kơ tang nuih mơng ăn tơ moi.

‘Nhŏng Đinh Mỡi- Kăn ƀô̆ jang tơ̆ Anih jŏh ayŏ kơ dŏ xoang apŭng Kbang, dêh char Gia Lai pơ ma: “Anih gru groa kăp gĭt kơ dêh char âu jĭ Tơ ring 10 găh xăh Kroong, apŭng Kbang, dêh char Gia Lai hlôi đei pơm hơ met ming. ‘Nâu jĭ anih tôch gĭt kăl, lơ̆m 2 sơ năm âu ki, jĭ hơ buh tơ pŏh dêh, anih chă tơ mang lăng tôch mơ mat. Hrei ‘nâu jĭ da ƀiơ̆ bơih, tơ drong chă tơ mang lăng nhen vă tŏk dơ̆ng, kơ dih kâu inh adrin jang hăm kon pơ lei vă pơ jing păng tưk tơ iung khul tôn chĭng chêng, dôm tơ drong jŏh ayŏ kơ dŏ xoang, hơ ri hơ xoang đơ̆ng nŏh vang vei kơ jăp, pơm hơ tŏk dôm tơ drong juăt ‘lơ̆ng đơ̆ng hơ drĕch kơ dih păng roi tơ ƀôh ăn bơ ngai chă tơ mang lăng lơ̆m păng ‘ngoăih kơ tĕh đak. Đe ngê̆ nhân kŭm nhen kon pơ lei vang vei lăng, roi tơ băt um rup chăl so sơ̆ păng tơ roi dơ̆ng ăn kon sâu vă đe sư băt anih gĭt kăl hăm kăch mang, hăm kon pơ lei tơ̆ Gia Lai pơ ma hơ drô̆ păng lơ̆m tĕh đak pơ ma atŭm”.

Dôm năr pơm kiơ̆ ưh kơ ăn chă năm vih vơ̆t lơ̆m tơ pôl vă tang găn jĭ covid-19 ‘noh jĭ khei ‘năr mă yă Thị Pyơm, oei tơ̆ plei Bu Nrung, xăh Đăk Bu So, apŭng Tuy Đức, dêh char Dak Nông, hơ met ‘lơ̆ng ăn bơ̆n khăn hơ băn ao tanh. Sư tơ roi, hloh 60 sơ năm tơ klep hăm tanh brai vai khăn, tam mă đei lai yơ yă tanh lơ nhen khei ‘năr âu ki. Dang ei tơ drong arih sa hlôi vih sơ đơ̆ng hmă hơ lơ̆k dơ̆ng bơ̆ih, yă hơ nơ̆ng pơ tho tanh brai vai khăn ăn kon sâu vă vei răk tơ drong oei sa ‘lơ̆ng hơ iă kơ hơ drĕch drŭng.

“Dôm tơ mam ĭnh tanh tă kơ hlôi đei tĕch đĭ. ‘Ngoăih kơ ‘noh ĭnh tanh oei lê̆ yua lơ̆m ŭnh hnam dơ̆ng. Ĭnh kŭm tanh lơ bơ̆n khăn hơ băn ao vă lê̆ ăn kơ kon hơ ‘lơ̆p, păng pơ tho kon drŏ kăn gơh tanh vă vei răk tơ drong jang joăt joe. Dang ei dôm bơ ngai gơh tanh tŏ sĕt, tơ dăh ưh kơ pơ tho ‘noh đe hơ ioh ưh kơ băt ôh.”

Thuem hăm Dơ̆ng: Tơ blơ̆