Hơkăt jĭ 1 lơ̆m dôm tơmam yoa tôch hơiă kơ bơngai Rađe oei chĕp vei kơjăp lơ̆m tơdrong arih xa kơ kon pơlei hrei ‘nâu. Um rup drŏ kăn Rađe pŭ hơkăt hơnơ̆ng pơm ăn lơ bơngai ƀôh hưch hanh, čhôk ‘nă yoa. ‘Nŏh jĭ um rup đơ̆ng đe drŏ kăn groi kông pran jăng, năm jang mir, chĕp ba tơmam ưh đei tơplĕh hăm kơdih kâu ‘nŏh jĭ hơkăt vă pŭ đak, phĕ hla ‘nhot, phĕ tôl, phĕ plui…

Kră pơlei Y Sao Hwing (83 sơnăm) tơ̆ plei Pơr, xăh Ea Tul, apŭng Čư̆ Mgar, dêh char Dak Lak tơroi, hơkăt đei lơ̆m tơdrong arih xa kơ tơpôl bơngai Rađe đơ̆ng sơ̆ bơih. Hơkăt kiơ̆ bơngai Rađe lơ̆m dôm sơnăm tơblăh ayăt sơ̆ păng truh dang ei hơkăt oei jing tơmam ưh đei thiê̆u hăm bơngai Rađe:

“Ưh băt đơ̆ng lai yơ đe tanh đei hơkăt, đơ̆ng nhôn oei ‘lơ̆p sơ̆, đơ̆ng chăl yă ƀok nhôn sơ̆ đĭ đei hơkăt bơih. Chăl yă ƀok gơ̆h tanh hơkăt, jơhnơr kon sâu đơ̆ng rŏng hŏk tanh rok. Năm kŏh pơ o, blăh, sơ̆k kơpal hơdra vă chăr chơ lak, sĭt tơnanh tanh hơkăt. Tơdrong kăl hlŏh jĭ tơdrong pơm tơpang hơkăt, tơpang ‘lơ̆ng, kơjăp ‘nŏh hơkăt gơ̆h yoa đunh, tơpang hơkăt đe đa pơm hăm ‘long châu, ‘long tô. Pơm đang tơpang ‘nŏh đe tanh. Mă hơtuch ‘nŏh đe pơm tăr, tăr hơkăt đe đa pơm hăm hre.”

Hơkăt oei jing tơmam pơrŏ tôch ‘lơ̆ng, lơ bơngai tanh hơkăt, tanh dơ̆ng trong dinh dông tôch hơiă kiơ̆ tơdrong pơchĕh, ‘mĕh vă đơ̆ng kơdih. Rup hơkăt hơnơ̆ng đei pơ ư lơ̆m dôm ƀai hơri brông, lơ̆m nơ̆r pơđơ̆k kơ bơngai Rađe. Tơpang hơkăt ‘lơ̆ng, bơngai tanh athei tanh tôch gơ̆h ‘mơ̆i, tanh tôch hơlen păng đunh ‘mơ̆i.

Kră pơlei Y Djuan Ktla (80 sơnăm) tơ̆ plei Triă, xăh Ea Tul, apŭng Čư̆ Mgar, dêh char Dak Lak tơroi: um rup đe yă, đe mĕ, yak jơ̆ng hŏh, pŭ hơkăt ƀât ‘năr vă mât hơnơ̆ng đei lơ̆m đon kơchĕng rim bơngai: “Vă tanh mĭnh pôm hơkăt tôch mơmat, lăp dôm bơngai ‘mĕh tanh, hưch hanh tơpă đĕch gơ̆h tanh. Nhen nhôn, băt mơ̆ng nơ̆r mĕ ƀă, yă ƀok, dôm bơngai gơ̆h tanh lơ̆m pơlei vă hŏk tanh hơkăt. Hrei ‘nâu kon pơlei oei yoa hơkăt vă pŭ năm tơ̆ mir. Lơ̆m dôm nơ̆r pơđơ̆k đei nơ̆r “Klo tôi tơgăk, pŭ hơnhăk hơkăt ‘nŏh lê̆ kăn, hroi hroi năm jang mir hơdoi”. Tơdrong ‘nâu ăn kơ bơ̆n ƀôh, đơ̆ng kră sơ̆ hơkăt đei yoa hơnơ̆ng lơ̆m tơdrong arih xa bơih.”

Hrei ‘nâu, hơkăt jĭ 1 lơ̆m dôm tơmam bơngai chă tơmang lăng đa chă răt tơ̆ dôm anih chă tơmang lăng lơ̆m tơring. Mă lei, sơnăm mơlôh bơngai Rađe hui bơngai oei ‘mĕh tanh bơ̆n hơkăt, dăh mă kơđum kơđŏng bơih, đe kră pơlei tôch pơngơ̆t, ‘mĕh chă trong pơm thoi yơ vă hơkăt đei chĕp vei, đei hơnơ̆ng lơ̆m tơdrong arih xa truh ning mônh kơnh.

Kră pơlei Y Sao Hwing (Aê Ƀlin) - 83 sơnăm, tơ̆ plei Pơr, xăh Ea Tul, apŭng Čư̆ Mgar, dêh char Dak Lak pơma: “Rim bơngai lơ̆m hnam đei hơkăt tih iĕ phara băl, đe mĕ, đe yă, đe hơdruh păh iung ‘nŏh hơkăt tih ƀiơ̆, đe ŏh hơiŏh drŏ kăn gô đei ƀok mă ưh ‘nŏh ƀă tanh ăn hơkăt iĕ tôch ‘lơ̆ng. Hrei ‘nâu lơ bơngai ưh gơ̆h tanh hơkăt bơih, inh tôch pơngơ̆t yoa dôm bơngai tơhnơr hăm nhôn lôch hơchăng, ưh pă đei bu gơ̆h tanh hơkăt kơ bơngai Rađe bơih, tơdăh dôm bơngai mơlôh ‘mĕh tanh ‘nŏh đe hŏk, ưh jor tanh gơ̆h ‘năi”.

Tơdrong arih xa chăl ‘nao, hăm lơ tơmam yoa ‘nao, ‘lơ̆ng hơiă mă lei hơkăt oei đei hơnơ̆ng lơ̆m tơdrong arih xa tơpôl, gĕl gŏl gĕl gŏl hơkăt pŭ tơ̆ rŏng đe drŏ kăn Rađe oei đei ƀôh hơnơ̆ng păng pơm ăn lơ bơngai lăp đon, čhôk ‘nă.