Mă đơ̆ng oei ƀât tŏk bŏk kăt yoă ƀa, mă lei rim gơmăng, Pleiku Roh, phường Yên Đỗ, pơlei tih Pleiku djơ djring kơ jơva chĭng chêng păng ƀơ̆r pơma hiĕk tôch hơiă tơ̆ rông. Yoa ‘nâu jĭ jơnăr văjê̆ 50 ‘nu bơngai lơ̆m khul tôn chĭng đe hơiŏh, khul tôn chĭng đe tơdăm păng kră hơmuh lơ̆m pơlei hơnơ̆ng pơtâp tôn lơ ƀai chĭng vă truh hăm Festival tôn chĭng Gia Lai 2023 pơgơ̆r ‘năr 11/11 păng 12/11. 

‘Nhŏng Siu Thưm - khul tôn chĭng đe tơdăm tơroi, khul tôn chĭng, hơri hơxoang đơ̆ng plei nhôn vă tôn hơri, hơxoang 4 ƀai ‘nŏh, tôn tơƀôh dơ̆ng tơdrong et jur xa ƀa ‘nao, hơri, tôn chĭng păng tĕh chĭng klơk: “Truh pơyan kăt, yoă ƀa bơih, mă lei đe ngê̆ nhơn oei adrin pơtâp dôm ƀai so mă lei hơxoang hơyŭn ‘nao vă tơdrong tôn chĭng, hơxoang roi ‘lơ̆ng hơiă, vă pơvih ăn tơmoi chă tơmang lăng.”

Tơ̆ apŭng Krông Pa, tơdrong hơmet kŭm tôch hơiă ‘năi. Ƀok Ngô Đức Mạo-Kơdră Anih vei lăng jŏh ayŏ kơ dŏ xoang-Tơroi tơbăt păng tơplŏng kơdâu apŭng ăn tơbăt: Sơnăm ‘nâu, apŭng ăn 50 ‘nu ngê̆ nhơ̆n vang truh akŏm hăm lơ tơdrong lơ̆m giĕng jŏh ayŏ kơ dŏ xoang, chă tơmang lăng kơ dêh char. Kiơ̆ kơ ‘nŏh, dôm ƀai tôn chĭng gô đei tôn lơ̆m festival; đe ngê̆ nhơ̆n vă tơƀôh dơ̆ng tơdrong juăt tanh bơ̆n hơkăt, reo, tơvăih, chrah mul, tanh brai vai khăn păng vang yak pơrŏ tơ̆ trong glung. Vă pơjing đei tơdrong ‘lơ̆ng hơiă thoi tơdrong juăt kră sơ̆ tơ̆ tơring, khul oei pai, prung hloi lơ tơmam xa nhen prung pơlăh đing, ƀuh nhĕm iĕr, ‘nhĕm rơmo kro vă tơmoi truh răt xa ngôi: “Lơ̆m rim gơmăng, đơ̆ng rŏng 1 năr choh jang, đe ngê̆ nhơ̆n akŏm tơ̆ hnam hŏk hôp tơpôl vă pơtâp pơhrăm. Hăm đe ngê̆ nhơ̆n chrah mul, tanh brai vai khăn, sĭt tơnanh, tanh hơkăt, hơmet chĭng preu đei hơmet tôm ‘năi vă năm truh tơ̆ Pleiku ‘nŏh rim tơdrong đei hơmet ‘lơ̆ng ngăl, vă roi tơbăt ăn tơmoi chă tơmang lăng. Rim kơmăng đe ngê̆ nhơ̆n chă pơtâp hơmet dôm tơdrong et soi so sơ̆ nhen et jur xa ƀa ‘nao, kŏh xa kơpô vă hơnhăk ba tơdrong juăt ‘lơ̆ng đơ̆ng bơngai Jrai tơ̆ Krông Pa truh hăm năr pơchơt".

Giĕng jŏh ayŏ kơ dŏ xoang-Chă tơmang lăng Gia Lai sơnăm 2023 vă pơgơ̆r đơ̆ng ‘năr 11/11 truh ‘năr 18/11 hăm tơdrong vang akŏm đơ̆ng dang 1.000 ‘nu ngê̆ nhơ̆n lơ̆m păng ‘ngoăih kơ dêh char. Giĕng lêh đei pơih blŭng hăm Festival chĭng chêng Gia Lai 2023 akŏm đei lơ khul tôn chĭng đơ̆ng 17 apŭng, thĭ xăh, pơlei tih lơ̆m dêh char păng dôm dêh char Tây Nguyên. Đơ̆ng rŏng kơ ‘nŏh jĭ dôm tơdrong lêh tôch hơiă nhen năr Lêh pơkao dur yoăn – kông unh Chư Đang Ya (apŭng Chư Păh); tơdrong thi hao thŏng nan tơ̆ đak krong Pô Cô (apŭng Ia Grai).

Ƀlep ƀât ‘măng mă âu, dêh char Gia Lai kŭm pơgơ̆r lơ tơdrong lêh tơ̆ trong glung; tơiung ming dơ̆ng dôm tơdrong juăt lơ̆m tơpôl, tơdrong jŏh ayŏ kơ dŏ xoang đơ̆ng kră sơ̆; ming pơdă, tôn reh dôm tơmam jŏh hơri Tây Nguyên, rup phĭn tơƀôh tơdrong juăt ‘lơ̆ng đơ̆ng Gia Lai, ră roi dôm anih gru groa gĭt kăl kơ teh đak păng tơmam kăp gĭt kơ teh đak đơ̆ng dêh char Gia Lai,...

Ƀok Nguyễn Xuân Hà- Kơdră Anih jŏh ayŏ kơ dŏ xoang- Tơroi tơbăt pơlei tih Pleiku, anih pơgơ̆r lơ tơdrong pơchơt hlŏh lơ̆m giĕng lêh ăn tơbăt: “Dang ei, dôm xăh phường, dôm anih jang lơ̆m pơlei tih Pleiku oei adrin hơmet vă jang ‘lơ̆ng tơdrong tơroi tơbăt, tơƀôh um ai Gia Lai pơma atŭm, um rup kon bơngai Pleiku pơma hơdrô̆ truh hăm tơmoi lơ̆m păng ‘ngoăih kơ teh đak. Hrei ‘nâu, dôm khul ngê̆ nhơ̆n tơ̆ lơ pơlei kon kông oei adrin pơtâp pơhrăm lơ ƀai tôn chĭng, hơri hơxoang, chrah mul, truh tanh brai vai khăn, tanh bơ̆n hơkăt vă hơmet ăn Giĕng jŏh ayŏ kơ dŏ xoang, chă tơmang lăng dêh char Gia Lai.”

Giĕng jŏh ayŏ kơ dŏ xoang-chă tơmang lăng Gia Lai sơnăm 2023 vă roi tơbăt dôm kơjă kăp gĭt, ‘lơ̆ng hơiă pơyoa ăn tơdrong chă tơmang lăng đơ̆ng dêh char Gia Lai, mă loi jĭ tơdrong tôn chĭng chêng Tây Nguyên đei lơ̆m tơdrong jang tưk tơiung ming, chĕp vei păng pơm hơtŏk kơjă kăp gĭt đơ̆ng tơmam jŏh ayŏ kơ dŏ xoang kăp gĭt kơ kon bơngai. Kơdră vei lăng kon pơlei dêh char Gia Lai Trương Hải Long athei, dôm anih jang kơpal hơtŏk đon tơnăp, kơchăng jang hơdoi, pơm ‘lơ̆ng ăn rim tơdrong, sơng đei kon pơlei, tơmoi chă tơmang lăng, bơngai tơmât jên jang, vang tơgop tưk tơiung mŭk drăm păng chă tơmang lăng lơ̆m dêh char. Dôm anih et xa, hnam hotel ưh gơ̆h hơtŏk kơjă ƀât ‘măng mă âu; kon pơlei tơ̆ pơlei tih Pleiku hơnơ̆ng tơlĕch jang trong jang Hnam chă pơyơ̆ng tơpôl ‘you rơgŏh nhen hnam pơyơ̆ng tơ̆ hnam kơdih… vă pơjing um ai ‘lơ̆ng hơiă, băt ‘mêm tơmoi, pơm ăn rim tơdrong đei pơgơ̆r sơđơ̆ng, ‘lơ̆ng hơiă.