Tơ̆ hop akŏm, bơngai tơchĕng hơlen tơdrong joăt so Linh Nga Niê Kđăm tơroi rơđăh, drŏ kăn ‘noh tơ ‘ngla tơm gĭt kăl lơ̆m kơplăh chĕp vei, pơjao tơroi dôm tơdrong kăp gĭt so đơ̆ng dôm hơdrĕch kon kông. Mă loi ‘noh, drŏ kăn hơgei Đắk Lắk, hăm hơnăp jang đơ̆ng kơdih, hlôi jang ‘lơ̆ng hơnăp jang hăm teh đak, hăm ŭnh hnam păng tơpôl.

Tơ̆ dêh char Đắk Lắk khei ‘năr âu ki hlôi đei lơ pơcheh hơgei, tơdrong jang tơchĕng hơlen khoa hŏk, tơdrong jang chĕp vei păng tơƀăk mong dôm tơdrong kăp gĭt so kơ dôm hơdrĕch kon kông ăn drŏ kăn tơlĕch jang tôch kơ jơnei păng tơƀôh tơdrong hơiă jơ̆p jang. Tơ̆ hop akŏm, tang măt dôm anih jang vei lăng teh đak kŭm nhen tơroi tơbăt găh tơdrong jang vei lăng, tơchĕng hơlen vă chĕp vei păng tơƀăk mong tơdrong joăt so ‘lơ̆ng hơiă hơdrĕch kon kông; tơdrong jang tơroi tơbăt, krao hơvơn bơngai jang lơ̆m khŭl drŏ kăn, mă loi ‘noh jĭ drŏ kăn bơngai kon kông vang chĕp vei păng tơƀăk mong tơdrong joăt so.