Atŭm hăm ‘noh jing pơgơ̆r rim tơdrong pơma dơnuh, tơƀôh tơbăt kơsơ̆p hla bơar “Bơngai mơlôh hăm ‘nhrơ̆ hơnăp jang”, pơdă rup “Jơhngơ̆m pran hơdruh tơdăm Khei 3” păng tơlĕch jang kiơ̆ giĕng 2 ‘măng pơlong tơchă băt bao chăl sơnăm 120 sơnăm pơjing, atŏk tơ iung dêh char Dak Lăk.

Tơ̆ hop akŏm, rim tơmoi hơvơn hlôi pơma dơnuh dih băl găh dôm tơdrong chih lơ̆m kơsơ̆p hla bơar  “Bơngai mơlôh hăm ‘nhrơ̆ hơnăp jang” kơ yuơ Hơnih pơm tơlĕch Kơsơ̆p hla bơar Chinh trĭ Quốc gia Sự thật pơm tơlĕch sơnăm 2023. Kơsơ̆p hla bơar au hơƀơ̆l đei 350 pang hlak, hăm 23 ƀai chih đei iŏk đơ̆ng rim ƀai chih kơtơ̆ng ang, tơdrong chă tơchĕng hơlen đơ̆ng rim kơdră chĕp pơgơ̆r Đảng, Teh đak; Đoàn, Hội, bơngai chih kơtơ̆ng ang, hơnih mơdro sa găh lơ tơdrong phara dih băl. Tơ̆ pơgơ̆r, Khul chĕp pơgơ̆r hlôi pơdă hloh 50 rup đei hơnăn "Jơhngơ̆m pran hơdruh tơdăm Khei 3”, tơƀôh hơdăh lơ um rup ‘lơ̆ng hơ iă găh rim tơdrong jang đơ̆ng hơdruh tơdăm Dak Lăk lơ̆m rim tơdrong jang.