- Duch Mlop ăi! Tơdrong jang joăt joe kơ rim hơdrung kon kông tŏk bŏk atŏk tơ iung kơtang, dôm bơngai băt tanh jĭt kăl đei pôk pơ ư. Dang ei ih tơroi lăng tơdrong jang kơ Hơp tak xah dui brai vai tanh khăn tŏ tơring G’Lar, apŭng Đak Đoa, dêh char Gia Lai.

Yă Mlop: “Ĭ ah, đei pơma dơnuh hăm kon pơlei pơla ƀlep lơ̆m jơ ‘năr blŭng sơnăm ‘nao lơ lau ba hiôk chơt đeh. Dih ba jĭ bơngai hưch hnanh hăm tơdrong jang au đơ̆ng sơ̆ khơ̆ dang ei, dang ei ba oei hơdrin, pơjing đei lơ dônh, ding dông ‘nao hloh dơ̆ng, vă đei khăn, hơbĕn ao tanh ‘lơ̆ng, lăp đon. Găh tơdrong jang kơ HTX nhôn ‘noh poei hơnơ̆ng jang đĕch, sơnăm au chă tanh sĭt đei lơ ƀiơ̆ păng tĕch hlot jei lơ mơ̆n”.

- Lei ah, bơnê kơ ih hăm HTX hlôi vei răk păng atŏk tơ iung. Mưh lei găh khăn, hơbĕn ao tanh mă HTX chă tanh mei hlôi đei tĕch mơdro tơ̆ yơ păng trong tech mơdro lơ liơ?

Yă Mlop: “Bơ̆n tĕch ăn tơ̆ Dak Nông, Dak Lak, Kon Tum, đei ‘măng tơ̆ Nha Trang, Đà Nẵng dăh mă tơ̆ Sài Gòn. Kơ yuơ hrei au hlôi đei điên thoăi bơih nĕ, bơ̆n chă pơma dơnuh, pơtruh ăn gre chơ ba jei ƀônh. Bơngai răt ‘noh pơtruh ăn jên kiơ̆ tài khoản kơna tơdrong tĕch mơdro ƀônh ƀiơ̆. Dôm tơmam tĕch hlot lơ hlŏh ‘nŏh găh: hơnĕn ao drŏ kăn, ao drŏ nglo, mă kăl găh kơdŭng tanh, ba chă tanh, mei kiơ̆ chăl hle, lăng tôch hơ iă mă lei oei vei kơjăp yă hăp đơ̆ng sơ̆ đĕch kơna đei lơ bơngai apĭnh răt. Đei hloi tơmoi đơ̆ng teh đak Mi, đơ̆ng teh đak đe, đe sư năm tơ̆ au chă ngôi, jei chă răt tôch kơ lơ văi”.

- Hơnih tĕch mơdro hơbĕn ao tanh đei pơih să, ưh khan lăp hơdrô̆ lơ̆m tơring Tây Nguyên mă lei pơ đĭ lơ̆m teh đak, đei ‘măng tơmoi tơ̆ teh đak đe. Mưh lei, tơdrong jang sa kơ rim bơngai lơ̆m HTX lơ liơ?

Yă Mlop: “Găh kơjă: Ao ‘noh mơ̆ng kơ loăi, 600.000, 300.000 hlak jên jei đei. Kơdŭng jei lơ kơ loăi 400, 500.000 hlak jên jei đei, 100.000 hlak jên jei đei mơ̆n. Găh tơdrong jang sa iŏk đei ‘nŏh mơ̆ng kiơ̆ tơmam drăm, bơngai bu tanh keh đang koăng, ‘lơ̆ng, chă tanh đơ̆ng pơgê truh tơ̆ kơsơ̆ ‘noh đei sa jên lơ ƀiơ̆”.

- Tơdrong jang dui brai vai tanh khăn joăt joe hlôi hơnhăk đei iŏk yua kơjăp ăn kon pơlei oei tơ̆ tơring G’Lăr, apŭng Đak Đoa. Hăm jơhngơ̆m đon hưch hanh hơmanh bơnê găh dui brai vai tanh khăn, kon pơlei hăm lăng truh tơdrong chă pơtho ăn jơhnơr mơlôh ưh?

Yă Mlop: “Atŭm hăm tanh brai, ba jei pơganh chă pơtho dui brai vai tanh khăn ăn lơ pơmai oh tơ̆ rim pơlei, đơ̆ng noh pơtho ăn rim đe mon lơ̆m khei năr pơdơ̆h hŏk. Dôm sơnăm tơjê̆ au ba oei hơnơ̆ng năm pơtho ăn rim đe mon Bahnar oei tơ̆ An Khê,  Mang Yang, Chư Sê..., tơ̆ tơring au sơ̆ đe jei băt chă tanh brai, mă lei roi năr roi hiong hiơt. Ba jei hơdrin năm pơtho tơ̆ hơtăih. Găh tơ̆ tơring kơdih ‘noh ƀônh ƀiơ̆, ba gơ̆h chă pơtho ăn tơ̆ pơgê kơsơ̆ tơ̆ hnam, ưh kơ đei tơdrong kiơ ôh.”

- Jang răh, pơtho răh, mưh lei tơmam dui brai vai tanh khăn kơ HTX pơjing đei hăm măh mai chă tĕch mơdro ăn kơ đe ưh, hŏ yă?

Yă Mlop: “Ƀơ̆t măt ‘noh ba chă pơtho ăn găh chă mei. Kmăi mei đei bơih, mă lei ưh kơ đei bơngai meu kơna ưh kơ gơ̆h vă pơm đei tơmam drăm tĕnh koăng ôh, lăp mĭnh ƀar ‘nu đĕch kơna jang ưh kơ kĕ ôh. Ba gô hơdrin chă tanh mă lơ, vă mưh tơmoi năm tơ̆ au ‘meh vă răt yă kiơ ‘noh đei hloi. Nhen mĭnh ƀar năr au ki đei bơngai ‘meh vă răt iŏk lơ kơdŭng tanh ră mă lei ưh kơ đei tôm vă chă tĕch, lơ bơngai apĭnh răt mă lei ưh kơ đei kơna brŏk hŏh đĕch, mơnat dêh. Kơ yuơ lơ loh, truh au kơnh ba gô hơdrin tanh mă lơ găh: kơdŭng, hơbĕn ao, khăn, găh kơdŭng ‘noh tôch kơ lơ kơ loăi, hloh 20 kơ loăi, vă trŏ lăp ăn rim bơngai ‘meh vă rơih răt iŏk”.

- Hưch hanh hơmanh bơnê hăm tơdrong jang dui brai vai tanh khăn, hơnih tĕch mơdro lơ, mă lei tơdrong jang kơ HTX oei tơnap tap, ih tơroi lăng găh tơdrong ‘nau?

Yă Mlop: “Mă kăl ‘noh găh jên tơmơ̆t jang. Lơ̆m khei năr rơhơi, pơyan ‘mi, lơ pơmai oh rơhơi tơdrong jang sa ‘noh ba tă ưh kơ đei kon jên vă kla ăn năr jang chă tanh kơ đe sư , kơna truh vă đĭ sơnăm lơ lau ưh kơ măh tơmam drăm chă tĕch. HTX nhôn oei ưh kơ măh kon jên tơmơ̆ty jang, tim mă đei tơgŭm djru lơ̆m tŏk iŏk kon jên đơ̆ng hơnih mong jên vă atŏk tơ iung. Lơ̆m dôm năr tơnap tap lơ lau ‘noh kơ dih ŭnh hnam chă tŏk iŏk jên đơ̆ng hơnih mong jên, mă lei ưh kơ măh dôm yơ, jĭ lăp vei kơjăp tơdrong jang đĕch, kơna tơnap tap dêh”.

- Lei ah bơnê kơ yă Mlop hơ! Ƀlep lơ̆m jơ ‘năr blŭng puih mak ‘nao, dôm bơngai bơ̆ jang apĭngh pơtruh nơ̆r ƀơ̆r pơma, hơvơh hơvơi hpơpơi ăn kơ yă hăm HTX dui brai vai tanh khăn tơring G’Lar, apŭng Đak Đoa, dêh char Gia Lai hơnơ̆ng jang sa iŏk yua kơjăp hloh dơ̆ng.

 Đơ̆ng noh, tơgop lơ̆m vei răk păng atŏk tơ iung tơdrong oei sa joăt joe ‘lơ̆ng rŏ sơ̆ ki kơ bơngai Bahnar.