VOV4.Bahnar - Pơ gê (24/4), tơ̆ plt Kon Tum, Anih tơm vei lăng jŏh ayŏ kơ dŏ xoang, tơ plŏng kơ dâu păng chă tơ mang lăng jang hơ doi hăm Dơ nŏ anih vei lăng kon pơ lei dêh char Kon Tum pơ gơ̆r hop akŏm “Chă tơ mang lăng Kon Tum - Tơ drong ‘lơ̆ng păng hơ mĕng”.

Ƀok Kơ dră Nguyễn Văn Hùng pơ ma lơ̆m hop akŏm

Hop akŏm sơng đei vă jê̆ 500 ‘nu bơ ngai tang măt ‘nŏh jĭ dôm bơ ngai vei lăng, bơ ngai chĕp kơ̆l anih jang, Khul grŭp, dôm grŭp jang tih găh tơ mang lăng, hnam hotel, chơ chuĕn; bơ ngai tang măt truh đơ̆ng 1,2 dêh char găh Pơ băh tĕh đak Lào, Hơ lĕch Kơ tu Campuchia đei trong sơ lam hơ dai hăm dêh char Kon Tum.

Pơ ma tơ̆ hop akŏm, Kơ dră tơm vei lăng jŏh ayŏ kơ dŏ xoang, tơ plŏng kơ dâu păng chă tơ mang lăng Nguyễn Văn Hùng pơ ma hơ dăh, Anih tơm păng dôm tơ ring lơ̆m tĕh đak đei lơ trong jang ‘lơ̆ng vă pơ gơ̆r bơ̆ jang tơ iung dơ̆ng tơ drong chă tơ mang lăng đơ̆ng rŏng kơ jĭ COVID-19. Hop akŏm "Chă tơ mang lăng Kon Tum - Tơ drong ‘lơ̆ng păng hơ mĕng” ‘nŏh jĭ tơ drong ‘lơ̆ng vă anih tĕch mơ dro tơ ƀâp, pơ ma nuh, kĭ pơ kăp hla ar jang hơ doi găh tơ mang lăng tơ̆ tơ ring.

Dơ̆ng: Tơ blơ̆