- Hmach kơ yă Nguyễn Thụy Phương Hiếu, tơdrong tơmang pơhiơ̆ tơ̆ Đak Lăk ƀenh kơ um rŭp joh ayŏ kơ hơdrung hơdrĕch,  băt chă vei lăng cham char, hơyak truh hơtŏk tơ-iung kơjăp sơđơ̆ng. Tơdrong mă âu đei đơ̆ng dôm sơkơ̆t hơtŏk tơ-iung kơ tơring thoi yơ yă ăi?

Yă Nguyễn Thụy Phương Hiếu: Đak Lăk hlôi sơkơ̆t hơdah tơdrong pran kơ po noh hơtŏk tơmang pơhiơ̆ cham char păng joh ayŏ. Hăm 49 hơdrung bơngai atŭm hơrih jang xa adoi jing minh tơdrong pran pơjing jơhngơ̆m pran ăn Đak Lăk pơtêng pơm jang hăm dôm tơring nai, pơjing đei lơ tơmam drăm hloh vă hơvơn tơmoi truh hăm tơring.

Tĭnh uy hlôi tơchơ̆t tơlĕch tơdrong jang gah hơtŏk tơmang pơhiơ̆, âu jing anih vă rim anih jang, rim tơring akŏm tơlĕch hơtŏk 3 tơdrong jang tơm gah tơmang pơhiơ̆, đei pơlei tơm Buôn Ma Thuột, Lăk păng Buôn Đôn. Rim apŭng, thĭ xah tăp dăr gô jing dôm anih tơm jang tơgŭm, pơjing dôm tơdrong tơmang pơhiơ̆ kiơ̆ tơring.  

Đak Lăk oei lơ̆m tơring pơkăp joh ayŏ chĭng chêng Tây Nguyên, noh adoi pơkăp hăm UNESCO gah vei răk chĭng chêng. Lơ̆m jăl sơnăm 2021 - 2025, dêh char hlôi tơlĕch lơ tơchơ̆t gah chĭng chêng, tơchơ̆t tơgŭm kon pơlei tơ̆ dôm thôn, pơlei hơtŏk tơmang pơhiơ̆ pơlei pơla. Akŏm jơhngơ̆m pran, dôm tơdrong jang, tơchơ̆t hơtŏk mŭk drăm tơring kon pơlei kon kông, iŏk jang kăp gĭt gah tơmang pơhiơ̆ vă vei răk tơƀăk mong joh ayŏ, vă hơtŏk răh tơmam drăm tơmang pơhiơ̆.

- Khei năr âu ki ‘noh tơdrong hơtŏk jang tơmang pơhiơ̆ kiơ̆ tơchơ̆t âu pơm jang đei jơnei thoi yơ koh yă?

Yă Nguyễn Thụy Phương Hiếu: Rim sơnăm noh tơdrong hơtŏk gah tơmang pơhiơ̆, tơdrong pơyua đơ̆ng tơmang pơhiơ̆ păng tơmoi truh tơmang adoi tŏk pơhlom đơ̆ng 10 – 15%, jô̆ hloi tơmoi lơ̆m teh đak păng đơ̆ng teh đak đe truh. Mă găn ga 2 sơnăm pơrang jĭ  Covid-19 hơbuh, mă lei tơdrong hơtŏk tơ-iung jăl sơnăm 2021 -2025 hloh kơ tơdrong tơchơ̆t tơlĕch.

- Hơtŏk tơmang pơhiơ̆ cham char păng akŏm joh ayŏ jang kiơ̆ tơdrong pran hlôi đei, lơ̆m kơplah lơ dêh char pơlei tơm nai adoi tŏk bŏk jang kiơ̆ trong jang âu, thoi noh dêh char Đak Lăk pơm thoi yơ vă tơroi gah tơdrong joh ayŏ hơdrô̆ kơ tơring truh hăm tơmoi koh yă?

Yă Nguyễn Thụy Phương Hiếu:  Lơ̆m sơkơ̆t hơtŏk tơmang pơhiơ̆ kơ dêh char tơlĕch tơguăt jang hadoi hăm dôm tơring, noh dêh char akŏm rơih dôm tơring pran gah tơmang pơhiơ̆ păng đei trong gre păr pơtoi hăm Đak Lăk. Dang ei dêh char hlôi jang atŭm hăm 14 dêh char, pơlei tơm păng minh jơnŭm jang tơ̆ anih jang kŏng ngĭp tơ̆ pơlei tơm Hồ Chí Minh. Kơyươ đei tơdrong jang hadoi, tơguăt dih băl noh lơ̆m tơdrong tơlĕch tơbang adoi hơtŭm pơjing dôm tơdrong akŏm iŏk yua jơhngơ̆m pran kơ đak dơsĭ hăm bri. Hăm tơmoi đơ̆ng teh đak đe noh kiơ̆ kơ đơ̆ng anih tơm nhen Khánh Hòa, Hà Nội, pơlei tơm Hồ Chí Minh vă chă hơvơn tơmoi truh hăm dêh char. Kơchăng chă tơroh, vang jang dôm tơdrong jang tơbôl vă tơbang um rŭp, tơdrong pran gah joh ayŏ, kon bơngai Đak Lăk truh hăm dôm tơring.

- Nhen ih ‘nao tơroi ‘noh iŏk yua tơdrong pran kơ rim tơring, tơguăt đak dơsĭ hăm bri vă tơgŭm ăn dih băl jing trong jang mă Đak Lăk tơguăt hơtŏk jang tơmang pơhiơ̆. Thoi noh tơdrong pran kơdih kơ Đak Lăk gô hơtŏk tơdrong jang tơmang pơhiơ̆ thoi yơ vă hơvơn tơmoi truh tơmang koh yă?

Yă Nguyễn Thụy Phương Hiếu:  Anih jang adoi sơkơ̆t hơdah ăn rim anih jang mŭk drăm kơchăng pơjing tơmam drăm ‘nao gơnơm đơ̆ng tơm joh ayŏ vă pơjing tơdrong ‘nao phara kơdih. Hơtŏk pơ-‘lơ̆ng gah vei lăng đơ̆ng teh đak, akŏm pơhrăm bơngai jang tơ̆ tơring, pơtrŏ hăm tơdrong kăl roi năr roi kơjung đơ̆ng tơmoi. Hơtŏk pran tơdrong jang kơ jơnŭm jang tơmang pơhiơ̆, pơjing dôm jơnŭm juăt jang, iŏk jang kiơ̆ tơdrong pran kơ dôm tơdrong jang nai, kiơ̆ đơ̆ng dôm tơdrong akŏm joh ayŏ, tơmang pơhiơ̆ dah mă dôm tơdrong pơlong tơplŏng kơdâu mă Đak Lăk pơgơ̆r vă hơvơn tơmoi truh hăm tơring.  

Lơ̆m khei 10 âu, Anih jang gô tơgŭm ăn Anih jang vei lăng kon pơlei dêh char pơgơ̆r tơdrong hop akŏm jang hadoi, kiơ̆ đơ̆ng noh gô pơjing tơdrong jang hadoi lơ̆m jăl ‘nao đei jơnei hloh. Atŭm hăm noh, Jơnŭm jang tơmang pơhiơ̆ Đak Lăk adoi gô pơjing đei 2 jơnŭm jang dơ̆ng, noh Jơnŭm jang Khăch sạn – tơmam xa păng jơnŭm jang Tơmang, iŏk yua tơdrong pran hơtŏk tơmang pơhiơ̆ tơ̆ tơring.

- Ŏ ah, bơnê kơ yă Nguyễn Thụy Phương Hiếu, Phŏ Kơdră Anih jang Joh ayŏ, Tơplŏng kơdâu păng Tơmang pơhiơ̆ Đak Lăk