Tây Nguyên jĭ tơring đei lơ cham char ‘lơ̆ng rŏ, tơdrong jŏh ayŏ kơ dŏ xoang ‘lơ̆ng hơiă đơ̆ng sơ̆, jĭ tơring arih xa hơdai đơ̆ng 47 hơdrĕch hơdrung, hăm lơ tơdrong juăt ‘lơ̆ng đei ư hơnhang ang hơnhăk, nhen: Tơdrong juăt tôn chĭng chêng Tây Nguyên, tơmam jŏh ayŏ kăp gĭt kơ kon bơngai; dôm tơdrong lêh tơdrong thi hao rôih, brư̆ kơ yang đang pơsat, et jur xa ƀa ‘nao… tôch hơiă đơ̆ng kon pơlei kon kông tơ̆ âu. Hăm hơnăn “Mĭnh vât năm, lơ anih truh”, anih chă tơmang lăng dôm dêh char Gia Lai, Đắk Lắk păng Kon Tum roi tơƀôh ăn lơ anih jang găh tơmang lăng tơ̆ Hải Phòng dôm tơdrong ‘lơ̆ng đơ̆ng chă tơmang lăng tơ̆ dôm tơring kŭm nhen dôm anih truh đei ư hơnhang, dôm tour chă tơmang lăng vă chông tơmoi truh hăm Tây Nguyên ‘lơ̆ng rŏ. 

Ƀok Nguyễn Đức Hoàng, Phŏ Kơdră Anih vei lăng jŏh ayŏ kơ dŏ xoang, tơplŏng kơdâu păng chă tơmang lăng dêh char Gia Lai ăn tơbăt: “Hăm dôm tơdrong juăt ‘lơ̆ng hơiă pha ra băl, lơ tơmam xa tôch ‘lơ̆ng pha ra băl đơ̆ng Hải Phòng păng dôm dêh char Tây Nguyên, mă loi jĭ Gia Lai ‘nŏh inh lui, tơmoi chă tơmang lăng Gia Lai dai tôch ‘mĕh chă tơmang lăng tơ̆ Hải Phòng păng tơplơ̆ dơ̆ng. Nhôn vă jang hơdoi hăm dôm anih jang đơ̆ng 2 tơring, pơm thoi yơ vă pơjing đei lơ trong, chông lơ khul năm tơmang lăng tơ̆ băl, đei hloi khul hŏk tro, công nhân, khul linh so… Inh tơchĕng ‘nâu jĭ tơdrong tôch hơiă păng đei yoa.

Roi tơbăt dôm tơdrong ‘lơ̆ng, tơdrong hơiă, tơdrong kăl đei chih răk vă atŏk tơiung chă tơmang lăng đơ̆ng Hải Phòng, ƀok Vũ Huy Thưởng, Phŏ Kơdră Anih vei lăng chăng tơmang lăng Hải Phòng akhan, hop akŏm jang hơdoi atŏk tơiung chă tơmang lăng âu ‘nŏh jĭ tơdrong jang tôch đei yoa mưh tơguăt tơring, dar dĕh tưk tơiung ming, hơtŏk hrĕnh tơdrong jang chă tơmang lăng roi đei yoa păng kơjăp ‘lơ̆ng: “Năr ‘nâu, nhôn sơng 3 tơring truh tơlĕch trong chă tơmang lăng păng kŭm jing 1 tơdrong ‘lơ̆ng vă roi tơbăt dôm tơmam cham char ‘lơ̆ng rŏ ăn tơmoi truh tơmang lăng đơ̆ng dôm dêh char Tây Nguyên. ‘Nâu jĭ 1 tơdrong tôch ‘lơ̆ng păng tơdrong ‘nâu gô đei hơtŏk tơ̆ hơnăp kơnh, ưh lăp hơdrô̆ hăm Tây Nguyên đĕch mă hăm dôm tơring nai lơ̆m tĕh đak hai, pơjing đei lơ tour, lơ tơmam chă tơmang lăng ‘lơ̆ng hơiă ăn tơmoi.”

Tơ̆ hop akŏm, Kơdră chĕp kơ̆l Anih vei lăng tơmang lăng Hải Phòng, Kơdră chĕp kơ̆l Anih vei lăng jŏh ayŏ kơ dŏ xoang, tơplŏng kơdâu păng chă tơmang lăng 3 dêh char Tây Nguyên kĭ pơkăp jang hơdoi atŏk tơiung chă tơmang lăng hăm tơdrong tơm ‘nŏh pơm hơtŏk tơdrong jang hơdoi vang iŏk yoa, tưk tơiung anih chă tơmang lăng jang tŏk pran, pơjing tơmam pơyoa ăn chă tơmang lăng ‘nao. Kŭm hăm ‘nŏh jĭ hơtŏk tơdrong roi tơbăt, tơlĕch trong jang, pơjing hơnăn tơmam, roi tơƀôh um rup chă tơmang lăng đơ̆ng 3 dêh char Đắk Lắk, Gia Lai, Kon Tum truh hăm Hải Phòng păng hơlơ̆k dơ̆ng.