Atŭm hăm anih tơbang tơmam xa kơ 21 tơring teh lơ̆m pơlei tơm Kon Tum, lơ̆m anih tơbang joh ayŏ tơmam xa tơ̆ trong Trần Cao Vân oei đei dôm anih 'măn tơmam kơ 3 apŭng: Kon Braih, Kon Plông păng Đăk Glei vang akŏm.

Hơvơn lơ bơngai truh hloh dôm tơmam xa ƀâu phu tru hŭt kơ bri kông nhen: por prung, ier ƀuh, ka glung, tơdrô sâm, tơƀăng iŭ 'nhot bri... Tơdrong kăp gĭt noh hăm dôm tơmam xa nhen lĕ iĕ ioch, nhen tơyông, ƀanh trang 'nŭng, 'nhot rơba, hơbâu... adoi đei tơbang vă kon pơlei păng tơmoi truh chă xa lăng.

Hăm pơkăp pơgơ̆r tih hloh đơ̆ng xơ̆ truh dang ei, ăh 'măng akŏm tơroi tơbang joh ayŏ tơmam drăm xa kơyuơ Anih jang vei lăng kon pơlei pơlei tơm Kon Tum pơgơ̆r hlôi đei pơhlom 1.400 'nu bơngai tang măt, kon pơlei, tơmoi đei xa dôm tơmam xa juăt jue păng tơmam et nhă.

Vang chă pai pơjing, tơroi găh joh ayŏ tơmam drăm xa ăh 'măng akŏm âu đei hloh 120 ngê̆ nhơ̆n păng bơngai juăt rơgei pai pơjing tơƀăng xa tơ̆ tơring.