“Ơ kon pơlei pơla! Đơ̆ng rŏng minh sơnăm hrat hrĭn hăm tơdrong jang mir na, ‘năr âu ƀa hlôi đei hơtŏk ƀenh sum, ge tơdrô đei pai jê̆ truh năr tơkang. Bơ̆n vih akŏm hơtŭm tơ̆ âu vă pôk bơnê kơ Yang hơpang hlôi asong ăn pơlei pơla minh sơnăm đei đak ‘mi kial sơđơ̆ng, jang xa mir ƀa na pơtăm giơ̆ng ‘lơ̆ng đei yua lơ, nhŭng iĕr đei lang lăp nhen kơ hmôch, kơpô rơmo lơ nhen kơ hơbâu tơ̆ đak. Ơ kon pơlei pơla! Bơ̆n vih tơ̆ âu akŏm et xa”.

Jơ ‘năr ‘lơ̆ng hlôi truh, kră pơlei K’Thế tơ̆ pơlei Srê Nhắc, thĭ trâ̆n Đinh Văn, apŭng Lâm Hà, dêh char Lâm Đồng hlôm hlôm rơvŏng păng hơvơn rim bơngai vih akŏm et xa. Tơl nơ̆r hơvơn, rim bơngai lơ̆m pơlei truh akŏm tăp dăr gơ̆ng hơnê̆ pơlei vă pơgơ̆r et soi. Ah tôm bơngai akŏm sơđơ̆ng, kră pơlei K’Thế pơtơm sơkat: “Ơ Yang chĭng chêng grasia! Tŏk bŏk dăng oei lơ̆m chêng tih, chêng iĕ; chêng yŏng, chêng kon. Kon pơlei đei mŭk răk, băt mơ̆ng, băt jang kiơ̆ tơdrong trŏ. Bơnê kơ yang păng hơvơn yang vih tơ̆ âu atŭm hăm pơlei akŏm et xa. ‘Năr âu pơlei pơla pơgơ̆r et soi, đei tơmam soi plang, đei tơdrô ‘ngam ‘lơ̆ng. Apinh yang asong pơdreh chĭng chêng pơ-ang bri kông, vă hơvơn bơngai atŭm truh sô̆ tơdrong et xa”.

Pơtôch nơ̆r sơkat, kră pơlei krao khan gia hăm minh pôm iĕr; atŭm hăm dôm tơmam soi plang nai nhen ka kro ƀoh, phe, tơyông, plei ‘long xa. Khôi soi tơbeh kăp gĭt vă apinh ‘nhăk hơmrŭk chĭng chêng gơh iŏk yua păng thơ thâu ăn rim bơngai gơh sơnêp grăng pran, đei lơ tơdrong pŭn ai. Pơtoi kơ noh khôi tơ-‘nhur rim tŏ chêng păng pơjaoa ưn 6 ‘nu tơdăm pơtơm pơdreh ƀai chêng “Gungme Gungma”, dang vă akhan “Hơ-iă sơng tơmoi truh”. Đơ̆ng rŏng kơ soi tơ-‘nhur chĭng chêng đang, jơva chĭng chêng ang bang vă pơtơm kơ tơdrong et soi. Kră pơlei K’Thế ăn tơbăt: “Hơdrung bơngai ayơ dah mă lơ̆m pơlei ayơ đei hơmrŭk chĭng chêng noh yang chêng dăng oei lơ̆m pơlei noh. Khôi tơ-‘nhur chêng noh vă apinh yang hơpang vih akŏm et xa sô̆ hăm kon pơlei lơ̆m dôm tơdrong et soi nhen pơtơm jơmŭl rei pơtăm ƀa mir dah mă pơm hnam, pơsĭt pơkong ăn kon hơ-ioh... Tôm ƀai chêng noh adoi đei yang asong ‘mơ̆i noh nhôn pơtơm khĭn chă pơdreh”.

Minh lơ̆m dôm tơdrong ‘lơ̆ng hloh lơ̆m Et soi kơ chĭng chêng noh pơlong chêng (Ching Yo). Lơ̆m ƀuih tơdrô ge, đe tơdăm pơlong tơbang tơdrong hơgei pơdreh chĭng chêng kơ po vă pơđep gah to ưh gơh pơdreh chĭng chêng păng đơ̆ng noh đei iŏk jơnei.

Tơdrong sô̆ pơtoi hơnơ̆ng thoi noh, tơdrô hrau hadoi jơva chĭng chêng roi păr ang hơtaih hloh. ‘Nhŏng Kra Jan K’Rông, tơ̆ pơlei Bồ Liêng, thĭ trâ̆n  Đinh Văn, apŭng Lâm Hà ăn tơbăt, chĭng chêng păng dôm tơdrong et soi jing dôm tơdrong kăp gĭt ưh kơ gơh kơƀah lơ̆m tơdrong hơrih kơ bơngai K’Ho: “Tơdrong tơgŭm đơ̆ng Đảng păng Jơnŭm pơgơ̆r teh đak hlôi drŭt kon pơlei roi năr roi khŏm mă vei răk khôi juăt kiơ̆ khôi gah mĕ. Noh jing minh kăp gĭt gah đon bơnôh, tơmam sô̆ hơ-iă kơ kon pơlei nhôn”.

Lơ̆m chĭng chêng đei yang, bơngai K’Ho tơgĭt vei răk, ưh đei iŏk yua kư̆ kă. Ƀok K’El, oei tơ̆ kueng kơphô̆ Ryông Srê, thĭ trâ̆n Đinh Văn, apŭng Lâm Hà, dêh char Lâm Đồng tơroi: chĭng chêng tơguăt hăm dôm khôi et soi tơrĕk truh jơhnơr hơrih kon bơngai păng dôm khôi juăt kăp gĭt kơ pơlei pơla: “Chĭng chêng kơ bơngai K’Ho đei 6 tŏ, chĭng noh đei 8 tŏ. Lơ̆m hơmrŭk chĭng chêng noh gơh pơdreh lơ tơdra, đei yua lơ̆m dôm tơdrong et xa akŏm et soi tih, pơtih nhen et hơtŏk ƀa, et pơsĭt pơkong păng ‘măn ăn dôm tơdrong et soi kăp gĭt noh nhôn adoi iŏk yua chĭng chêng. Chĭng chênng jing minh mŭk drăm kăp gĭt hloh kơ kon pơlei K’Ho”.

Lơ̆m dôm tơdrong et soi kơ bơngai K’Ho, et soi kơ chĭng chêng jing tơdrong et soi pơih blŭng vă apinh yang hơpang ăn tơ-‘nhur chĭng chêng gơh iŏk yua. ‘Nâu adoi jing khôi vă pơih ăn lơ tơdrong et soi ƀenh ƀang kơ jơva păng đak kơ-ang jơ̆p jang. Tơdrong hơrih roi năr roi hơtŏk tơ-iung, kon pơlei adoi lăng tơgĭt păng pơtoi vei răk tơƀăk mong dôm kơjă joh ayŏ juăt jue kră sơ̆. Lơ̆m noh, tơdrong et soi kơ chĭng chêng jing minh tơdrong kăp gĭt, đei kon pơlei K’Ho đei vei răk lơ̆m lơ tơdrong et xa hrei âu.